Организацијата оцени дека одговорот на Владата е задоцнет, селективен и недоволен и побара Обвинителството да ја испита можната кривична одговорност
ЦИВИЛ – Центар за слобода побара политичка, правна и институционална одговорност по објавите на Демократската партија на Србите во Македонија – ДПСМ и директорот на Агенцијата за остварување на правата на заедниците, Далибор Китановиќ, со кои беше величан Ратко Младиќ.
Младиќ беше правосилно осуден на доживотен затвор за геноцидот во Сребреница, злосторства против човештвото и воени злосторства во Босна и Херцеговина.
„Неговата смрт не ги брише злосторствата, не ја менува пресудата и не ја намалува болката на жртвите, преживеаните и нивните семејства“, порача ЦИВИЛ.
ДПСМ, чиј претседател Иван Стоиљковиќ е министер во Владата, го претстави Младиќ во позитивен и херојски контекст. Китановиќ објави фотомонтажа во која Младиќ, заедно со четничкиот командант Дража Михајловиќ и други личности, е прикажан како еден од „генералите на небеската војска“.
ЦИВИЛ нагласува дека не станува збор за приватни ставови на маргинални поединци, туку за објави поврзани со владејачка партија, министер и директор на државна институција.
Организацијата го оцени досегашниот одговор на Владата како задоцнет, селективен и недоволен. Реакцијата пренесена преку медиумите се однесува само на Китановиќ и му остава можност да остане на функцијата доколку ја повлече објавата.
„Повлекувањето или бришењето на објавите не ја поништува одговорноста“, се наведува во соопштението.
ЦИВИЛ бара премиерот Христијан Мицкоски да покрене постапка за разрешување на Китановиќ, да се утврди одговорноста на Стоиљковиќ и да се покрене постапка за негово разрешување и законска одговорност.
Од Јавното обвинителство се бара да отвори предмет и да утврди дали објавите ги исполнуваат законските обележја за кривична одговорност според член 407-а од Кривичниот законик.
ЦИВИЛ го осуди и премолчувањето или маргинализирањето на злосторствата на Младиќ во дел од медиумите, оценувајќи дека систематското отстранување на злосторствата и жртвите од неговата биографија создава „намерно креирана информациска празнина“.
Организацијата побара и конкретни европски мерки против владите, институциите и политичките структури што промовираат или толерираат негирање геноцид и величање воени злосторници. Истовремено, повика на поголема поддршка за независните медиуми, граѓанското општество, интелектуалците и бранителите на човековите права во регионот.
Во соопштението се нагласува дека осудата на злосторствата на Младиќ не претставува непријателство кон српскиот народ, туку солидарност со демократските сили во Србија и регионот.
„Нема помирување без правда. Нема правда без одговорност. Нема одговорност без вистина. Нема европска иднина со величање воени злосторници.“
Целото соопштение е достапно на ЦИВИЛ МЕДИА.