Сребреница не е само симбол на страдањето; таа е најстрашниот сведок на човечката суровост и погубната цена на меѓународната рамнодушност. Сребреница е крвавиот печат кој нè потсетува што се случува кога националистичката омраза ќе триумфира, а светот само ќе го сврти погледот настрана.
Пред точно 31 година, во срцето на Европа се случи незамисливо злосторство – геноцид. Во тој мрачен јули 1995 година, над 8.000 мажи и момчиња беа брутално ликвидирани исклучиво поради нивниот идентитет – затоа што беа Бошњаци и муслимани. Илјадници мајки останаа без своите синови, сестри без браќа, а деца без татковци. На жртвите не им беше дадена милост, а преживеаните беа осудени на вечна агонија и неправда. Таа болка не е историја – таа пулсира и денес.
Како организација чиј темел се слободата, човековите права и мирот, ЦИВИЛ денес не само што се сеќава, туку и силно предупредува. Длабоко се поклонуваме пред жртвите и стоиме во непоколеблива солидарност со нивните семејства. Нивниот нечуен крик е аларм до целото човештво: мракот на шовинизмот, национализмот и насилството не смее никогаш повеќе да добие простор.
Геноцидот во Сребреница, стои во соопштенитето на ЦИВИЛ центар за слобода, не е затворено поглавје. Тој е отворена рана и наша најтешка должност. Имаме цивилизациска обврска бескомпромисно да се спротивставиме на секој обид за негирање, релативизирање и бришење на вистината. Историскиот ревизионизам, засилен од мрежи за дезинформации и тактики на хибридна војна, е само продолжување на злосторството со други средства.
Тишината пред злото не е неутралност – таа е соучесништво. Затоа ЦИВИЛ гласно и недвосмислено порачува: Паметиме. Бараме одговорност и правда. Сребреница – никогаш да не се повтори!