Published: Tuesday, September 21, 2021 10:26
Во институцијата ДЗСИ, каде таа е директор, сите се или вакцинирани или прележани
Д-р Ирина Бухова, директорка на Државниот здравствен и санитарен инспекторат, ја нагласува важноста медицинските лица, докторите, персоналот, да бидат вакцинирани, затоа што постојано се во контакт со пациенти. Гостувајќи на Утрински Брифинг, таа денеска зборуваше и за вонредната инспекциска контрола на ДСЗИ во модуларните болници низ земјата.
– Ние сме постојано на терен. Немаме затекнато некој неовластено да престојува во ковид болниците. За надзорите по 8 септември, кога се случи несреќата со пожарот во Тетово, значително е поголема дисциплината и е сменета атмосферата во сите болници, по овој несреќен случај – вели Бухова.
Таа тврди дека ДСЗИ постојано ги контролира санитарните услови во сите болнички објекти, но дека и понатаму постои ризикот за интрахоспитални инфекции.
Според неа, сите медицински лица мора да бидат вакцинирани. Во институцијата ДЗСИ, каде таа е директор, сите се или вакцинирани или прележани, во период од закрепнувањето кога не можат да бидат веднаш вакцинирани.