На првиот ден на седмата сезона на FWSK ( Модна недела Скопје) во т.ц. Соравиа се одржа модниот перформанс на Никола Ефтимов и неговата асистентка Александра Јовановска.
Зад навидум претенциозниот назив на колекцијата – „Being Nikola Eftimov“, базиран врз филмско остварување (Being John Malkovich), се крие интимната желба повторно да се актуализираат дел од формите, типовите доработки, текстурите, боите, кои изминативе две децении постојано го фасцинираат македонскиот моден креатор во неговата дизајнерска работа.
Процесот на осмислување на колекцијата е започнат со стилското истражување на седумдесеттите години од минатиот век, особено од аспект на интернационалниот боемски дух. Колекцијата во себе содржи елементи на реинтерпретација на одредени видови облека преземени од историјата на костимот и крајно стилизиран фолклор.
Оваа мешавина е зачинета со неизбежното влијание на уличната мода и младешкиот бунт за постојано релативизирање на етаблираните вредности. Дел од материјалите се перени по неколку пати, за да се постигне „винтиџ“-чувство. Тие се бојадисувани, сликани, обезбојувани, рачно везени итн. Палетата е базирана на сивото, црното и валканото бело, со акценти на интензивни бои