Издавачката куќа “Феникс“ го објави новиот роман “Дали го сакате Дали“ од писателот Христо Петрески. Ова е негов трет роман, по романите “Лифтот (не) е за двајца“, награден со “Рациново признание“ и „Книжевно перо“ и “Твоите = мои очи“, со што се заокружува трилогијата негови романи посветени на градот Скопје.
Третиот роман на Петрески, “Дали го сакате Дали“, е поделен на три дела: “Бел град“, “Црн град“ и “Сив град“, а на крајот има и бонус од четири белградски раскази.
Како и во претходните романи, и во оваа најнова романескна книга, Петрески го истражува, опишува и демистифицира урбаниот живот и амбиент, со сите негови специфичности, нелогичности и тајни. Така, овојпат, главен лик е анонимниот но извонреден сликар Салватор Дали, кој е всушност питач и живее во подрумите на скопската населба Капиштец. Салватор своите ликовни дела ги подарува за топла чорба или чаша алкохол, а во Белиот, Црниот и Сивиот град се случуваат и безброј други несекојдневни нешта.
Како мешавина од реалноста и фикцијата, Петрески испишува стварносно-надреална проза, проговорува јасно и недвосмислено, жестоко и полемички, откривајќи и разгрнувајќи бројни апсурди, парадокси, случувања, појави и феномени…