„Договорот е штетен за националните интереси, но идеален договор нема. Овој Договор ги отвора вратите за брз влез во НАТО и извесна иднина за влез во ЕУ, и тоа треба да го знаат граѓаните. Волјата на народот беше јасна, а тоа го потврди и Државната изборна комисија која соопшти дека референдумот не е успешен. Затоа како пратеник немам ниту волја, ниту можност да гласам за уставни измени“, кажа од собраниската говорница координаторот на пратеничката група на ВМРО ДПМНЕ Драган Данев.
Данев гласаше на референдумот и објасни дека тоа го сторил затоа што ставот на неговата партија повеќе од една деценија бил дека за спорот за името треба да одлучат граѓаните на референдум. На власта и напомена дека „се ставила на една карта – решавање на деценискиот спор“, но не успеале да ја внесат Македонија во ЕУ и НАТО со привремената референца.
Данев кажа дека го цени повикот на премиерот за помирување.
„Никогаш не е доцна но грешките треба да ги признаеме и ние и вие. Оваа процедура не треба да заврши со предавници и патриоти, туку со почитување на волјата на народот“, кажа Данев.
Премирот Заев во реплика до Данев кажа дека „никому не му е лесно, ни на вас, ни нас“. Тој потврди дека Владата вложила големи напори за решавање на овој проблем затоа што како што кажа „успешноста на земјата беше релативна без решавање на овој 27 годишен спор“. Тој уште еднаш ги повика пратениците да се обединат за членство во НАТО и ЕУ.
Во моментов е пауза – досега говореа 6 пратеници, а пријавени за дискуија се уште 60.
Претходно, Артан Груби од ДУИ кажа дека “иднината се гради со храброст, а не со историја“.
– Пред нас има три копчиња, зелено е за иднина, црвено за стагнација и изолација. Имајќи ја моќта во вашите раце, со ваша визија, предизвикајте го голиот популизам, немој да се криете позади народот, бидете протагонисти, не статисти. Денес засадуваме дрво, а вие зборувате за стравот од привремената сенка. Денес знаеме што е правилно, затоа е време за донесување на најдобрата одлука во вашиот живот и вашата кариера. Која е пожртвуваноста што се очекува, тоа е едно притискање на зеленото копче за да нашата држава има иднина“, кажа Груби.
