Американските олимпијци кои во татковината ќе донесат медала, му носат награда и на Олимпискиот одбор на САД (25.000 долари за злато, 15.000 долари за сребро, 10.000 за бронза), а сето тоа подлежи на даночен закон. Како и секоја друга награда како џекпот на лотарија или Нобелова награда, така и за олимписката парична награда и медали, спортистите мораат да платат данок, објаснува Стивен Гил, професор на Државниот универзитет во Сан Диего.
Американците ова го нарекуваат „данок на победа“, а најмногу ќе ги погоди најдобрите и најуспешните како Мајкл Фелпс, кој во Рио освои шест медали (пет златни и една сребрена). Максималниот износ што спортистот може да го плати за бонус за една златна медала со најголема даночна стапка (39,6%) изнесува 9900 долари, за сребро 5940, а за бронза 3960 долари. Така излегува дека неверојатниот Мајкл Фелсп на државата ќе и плати 55.440 долари за шест освоени медали во Рио.
„И медалите подлежат на оданочување, но цените на самите медали не се големи и зависат од уделот на злато, сребро, односно бронза. Златото вреди 600 долари, среброто 300, а бронзата е речиси безвредна, па не се оданочува“ – вели даночниот експерт Блејк Кристијан.
За овој закон долго се расправа во самиот врв на американската власт. Од него, тврдат некои, треба да се издвои делот за олимписките победници, бидејќи е срамота да се оданочуваат прваци кои се прославиле во татковината. Во расправата се вклучија сенаторите Марко Рубио и Чак Шумер, а дури и претседателот Обама рече дека олимпијците треба да се издвојат од овој закон.
А, кога станува збор за самиот износ, тој за богаташи како Фелпс не е никаков проблем, со оглед дека неговото богатство се проценува на околу 55 милиони долари.