Данска од денеска ги укинува речиси сите мерки и покрај се поголемиот број на новозаразени со коронавирус. Така, Данците, меѓу другото, повеќе не мора да носат маски и да покажуваат потврди за прележан ковид-19, се укинува и скратеното работно време за гастрономија и повторно се дозволени поголеми собири. На сила остануваат само одредени ограничувања за влез во земјата.
Вечерва се отвораат и ноќните клубови. Патниците можат да се возат во автобус без маска, а продавниците можат да го укинат ограничувањето на бројот на клиенти. На сила остануваат само правилата за тестирање и изолација при влез во Данска кои ќе важат уште четири недели.
Повеќе од 60 проценти од луѓето се вакцинирани со третата доза
Владата го оправда укинувањето на мерките со големиот број на вакцинирани граѓани: повеќе од 60 отсто веќе ја примиле третата доза. Дополнително, и покрај наглото зголемување на бројот на заразени, здравствената заштита не е преоптоварена, бидејќи омикрон сојот очигледно предизвикува болести со поблаги симптоми, пренесува „Дојче веле“.
Данска со денови бележи по 40-50.00 нови случаи на ден. Властите проценуваат дека околу 80 отсто од населението е заштитено од тешки болести.
Со оглед на тоа што омикронот не е сериозна болест за вакцинираните, сметаме дека укинувањето на мерките е разумно, сметаат епидемиолозите.
Граѓаните се повикани на лична одговорност
Граѓаните се повикани на лична одговорност, бидејќи нема повеќе маски или сертификати за коронавирус, а 64 отсто од анкетираните Данци рекоа дека ѝ веруваат на нивната влада за проблемот со ковид-19.
Тамошната јавна здравствена служба претпоставува дека коронавирусот во иднина ќе биде како грип и дека ќе се враќа брановидно, што, додаваат, може да бара ревакцинација на постарата популација.
Обединетото Кралство, Ирска и Холандија објавија слични одлуки минатата недела за укинување на повеќето ограничувања за коронавирусот, иако бројките за инфекција со омикрон остануваат високи. Меѓу наведените причини се и тоа што бројот на заразени падна под пикот и дека бројот на хоспитализирани е помал од очекуваното.




