Кралицата Маргарет II од Данска и шпанскиот крал Филип VI се позитивни на коронавирус, соопштија денеска двете кралски семејства.
Кралица Маргарет (81) имаше само благи симптоми, а дека е позитивна беше откриено претходната вечер, се наведува во соопштението на кралското семејство.
Кралицата моментно се наоѓа во замокот Амалиенборг во Копенхаген, а откажано е нејзиното планирано зимување во Норвешка, кое требаше да почне денеска.
Данскиот кралски двор се придржува до упатствата на надлежните здравствени институции, а кралицата веќе примила три дози од вакцината против коронавирус.
Кралот Филип од Шпанија, исто така, имал поблаги симптоми во текот на ноќта и ќе остане во изолација една недела.
„Здравјето на неговото височество е добро и тој ќе продолжи со институционални активности од неговата резиденција“, соопшти кралската палата, додавајќи дека кралицата Летиција и нивната ќерка принцезата Софија немаат никакви симптоми.