Актерот и директор на МНТ – Театар Центар Дејан Лилиќ во интервју за порталот ТЕЛЕГРАФ одговора на честите обвинувања дека тој е „вмровски“ директор. Со богата фотогалерија пред новиот театар кој е дел од проектот Скопје 2014 Дејан Лилиќ зборува за небесната правда и за правото на луѓето да зборуваат за или против него, како и за успесите на власта во полето на театарот.
Телеграф: Велиш не размислуваш негативно, но како реагираш кога ќе речат за тебе: „Ете го партискиот директор на ВМРО-ДПМНЕ“?
Дејан Лилиќ: Ако си добар уметник не е важна власта. За жал, кај нас сè се потенцира политички. Едноставно, против тоа нема борба. Луѓето може да излажат, да пуштат злонамерна информација, па ти да пуштиш демант и никому ништо. Важно е што има луѓе кои те познаваат и знаат дека се трудиш и околу театарот, а се трудиш и како човек, да создаваш вистински вредности.
-Сепак, јавни личности сме во кои секој „може да пука“. Тоа е судбина на сите оние кои се занимаваат со ваков вид професија. Но, јас верувам во небесна правда. Да, јас сум директор поставен од владата на ВМРО-ДПМНЕ. Од владата што ги подигна платите на уметниците да бидат конечно достојни. И конечно од владата што ја изгради новата зграда на Македонскиот Народен Театар и со тоа го остваривме повеќедеценискиот сон. Секој може да зборува што сака, но јас во животот научив дека само со дела човек може да покаже колку вреди, вели Лилиќ во интервјуто за порталот ТЕЛЕГРАФ.
Дејан Лилиќ како директор на МНТ – Театар Центар и актер беше еден од предводниците на протестот против опозицијата во Декември минатата година за време на блокирањето на буџетот. Тогаш тој на своите колеги им се обрати велејќи дека протестот против опозиционерите е во одбрана на уметноста бидејќи тие барале да се кратат парите за изградба на нови театри.
Овој протест предизвика многу контроверзи, но и реакции кај неговите колеги во театарот кои одбија да учествуваат, на како што тврдеа, политички монтиран протест. Режисерката Зоја Булзаковска беше помеѓу првите кои го изразија револтот на социјалните мрежи поради одлуката да се протестираа и ги повика своите колеги уметници да не направат нешто од што подоцна ќе се срамат.
„Оваа битка е уште еден бескрупулозен обид на власта да продолжи со своето расипништво на парите од граѓаните, во која уметниците ќе ? послужат како маша, за политиката на континуирано осиромашување на народот заради личното богатење на неколкумина. Нејзините механизми на дејствување, како и нејзиниот начин на мислење, ги видовме, т.е. ги прочитавме доцна во ноќта и самите, не мора да ги претпоставуваме. Се надевам дека овој апел ќе го сфатите правилно, зашто нема пострашно чувство од она, кога човек подоцна ќе се почувствува изманипулиран”, напиша таа.
Актерот Тони Михајловски, пак, напиша дека не штрајкувале уметниците, туку техничарите, хигиеничарите и гардероберите, како и „неколку неуспешни обиди за уметници“.
„Денес се засрамив од уметноста, од професијата. Од себе. Се чувствувам предаден, изигран, продаден… емотивно ограбен”, напиша Михајловски кој и отворено влезе во конфликт со директорката на театарот комедија Јелена Жугиќ, исто така поддржувач на протестот.
Сепак, најнепријатно беше за време на новинарските прашања. На новинарско прашање дали знае колку чини старо – новиот театар тој одговори дека не знае и не го интересира. Откако новинарите му кажаа дека од предвидени 4,5 милиони евра театарот достигнал речиси 45 Лилиќ се бранеше дека не навлегувал во економија. Но, најмаркатниот одговор дојде од Јелена Жугиќ која изјави дека во Франција се граделе дворци и кога не течело мед и млеко.
Дејан Лилиќ и Јелена Жугиќ од едни беа обвинувани дека протестот бил реализација на партиска задача, додека други ги бранеа дека тие ја бранеле уметноста. И двајцата се поставени за директори за време на владеењето на ВМРО ДПМНЕ, со таа разлика што Лилиќ дојде на директорската позиција во етаблираниот Театар Центар, додека Жугиќ стана директорка на новоформениот Театар – Комедија, кој се уште нема сопствени простории.