На неформалниот состанок на лидерите на Европската унија со претставниците на земјите од Западен Балкан, Украина и Молдавија, беше заклучено дека е неопходно да се заокружи визијата за ЕУ збогатена од Западен Балкан, Украина и Молдавија.
Во Заедничката декларација се наведува дека на неформалниот состанок во Атина била подвлечена потребата од обновен и рефокусиран процес на проширување што е опиплив и веродостоен, без кратенки до воспоставените услови, се вели во соопштението објавено на веб-страницата на грчката влада.
Се вели дека Украина и Молдавија се посветени на преземање на следните чекори во нивниот пристапен процес по завршувањето на неопходните реформи.
„Цврсто веруваме дека 20 години по самитот во Солун и во светлината на новата геополитичка реалност, време е да се усвои храбра и амбициозна крајна цел која ќе послужи како водич, инспирација и рамка. Руската инвазија на Украина е клучен момент за Европа, кој создава ново ниво на свест за заеднички принципи, единство и заедничка иднина во ЕУ. Ова е критичен момент за безбедноста, мирот и стабилноста на нашиот европски континент. Законите и принципите кои придонесоа за стабилниот и предвидлив европски безбедносен поредок толку долго е соборен и повторно сме сведоци на манифестацијата на деструктивните ефекти на ревизионизмот“, се наведува во текстот објавен на веб-страницата на грчката влада.
Како што се наведува во текстот, се изразува „непоколеблива поддршка за независноста, суверенитетот и територијалниот интегритет на Украина во нејзините меѓународно признати граници, засновани на вредностите на демократијата и владеењето на правото“.
„Во нашите разговори во Атина, ја изразивме нашата поддршка и благодарност за искрените напори на претседателот на Украина, Володимир Зеленски, да ги постави принципите на мирот во согласност со Повелбата на ОН, во неговата мировна формула. Ги поздравивме и напорите на Генералното собрание на ОН да промовира сеопфатен, праведен и траен мир во Украина. Се согласивме дека не може да има неказнивост за воените злосторства и други злосторства, како што се нападите врз цивили и уништувањето на инфраструктурата, и сите одговорни мора да одговараат“ се наведува во текстот на декларацијата.
Нагласено е дека на самитот во Солун пред 20 години е признаено дека Западен Балкан припаѓа на Европската Унија.
„Ескалирачката војна на агресија против Украина ја откри итната потреба за силна, издржлива и инклузивна ЕУ како камен-темелник на мирот и просперитетот меѓу нашите народи во овие тешки времиња. Нагласивме дека Западен Балкан, Украина и Република Молдавија, кои географски се во непосредна близина на земјите-членки на ЕУ, тие имаат заедничко европско наследство, историја и иднина дефинирани со заеднички можности и предизвици.Како стратешка инвестиција за мир, безбедност и стабилност во Европа, важно е овие региони да бидат прифатени како полноправни членки на европското семејство“, се заклучува во заедничката Декларација.
На неформалниот состанок во Атина, на покана на грчкиот премиер Киријакос Мицотакис, учествуваше и претседателката на Советот на министри на Босна и Херцеговина, Борјана Кришто, претседателот на Србија Александар Вучиќ, премиерот на Северна Македонија Димитар Ковачевски, хрватскиот премиер Андреј Пленковиќ, претседателот на Црна Гора Јаков Милатовиќ, премиерот на Косово Албин Курти, премиерот на Грција Киријакос Мицотакис, претседателот на Украина Володимир Зеленски, претседател на Молдавија Маја Санду и премиерот на Романија Јон-Марсел Колаку.
Присутни беа и претседателот на Европскиот совет и претседателот на Европската комисија Шарл Мишел и Урсула фон дер Лајен.