Италијанските области продолжуваат да се борат со големиот број на шумски пожари, јави агенцијата ДПА. Од различни региони се добиени 234 барања за помош со цистерни и авиони во борбата со огнената стихија. Активни пожари има во Калабрија на Сицилија и на островот Сардинија. Повеќето од нив започнале поради небрежност или биле предизвикани намерно. Во моментот има 240 активни пожари низ целата држава.
На Сардинија, каде почна битката со пожарите во минатиот викенд, избувнаа нови во провинцијата Ористано, при што беше евакуиран и камп во областа Базилика. На Сицилија, во Агриџенто, пожарникарите се обидуваат да се справат со пожар на фронт од пет километри. Ситуацијата ја влошуваат горештините, сушата и силните и топли ветрови.
Во северна Италија, ситуацијата е сосема поинаква. Таму има поројни дождови што предизвикаа поплави и лизгање на земјиште. Најтешко погодени се провинциите во регионот Ломбардија, околу езерото Комо.