Лејла Анакиевска, вработена во полицијата со 21 годишен стаж е нов командир на Полициската станица од Општа надлежност во Делчево, јави локалниот портал Делчево365. Анакиевска довербата ја доби со мнозинство гласови на седница на делчевскиот Совет на Локалната самоуправа, чии советници имаа можност да гласаат за еден од тројцата кандидати, по втората листа предложена од министерот за внатрешни работи Оливер Спасовски, откако првата предложена листа, на една од минатите седници беше одбиена.

Од советничката група на ВМРО – ДПМНЕ изјавија дека нема да гласаат за ниту еден од предложените кандидати. На кандидатската листа освен Анакиевска се најдоа и вработените во полицијата Илчо Дончевски и Марија Постоловска.

„Очекуваме новиот командир успешно да работи во интерес на намалување на малолетничката деликвенција, намалување на криминалот, во делот на подобрување на сообраќајната култура и сузбивање на појавата на опојни супстанци меѓу младите“, истакнаа од опозициската ВМРО – ДПМНЕ.(Р.Н.)