Музичко сценската приказна „Инсомниа“ на македонскиот композитор Никола Коџобашија, на 15. и 16. март гостуваше во Данска и Италија. Режијата на ова дело ја потпишува данскиот театарски доајен Таге Ларсен од „Один театрет“ од Холстебро.
„Гостувавме и во реномираниот „Аркола“ театар во северен Лондон . По успехот проследен со овации и распродадените билети, добивме понуда од страна на уметничкиот директор, оваа наша претстава наскоро да се врати на редовниот репертоар на „Аркола“ и тоа под патронат на примадоната на светскиот театар Кетрин Хантер, позната уште како музата на Питер Брук.
Ова е исклучителна чест, имајќи предвид дека се работи за сцена со долга и квалитетна историја и за инцијатива на артистка од врвен калибар“, вели Коџобашија
Со Кетрин Хантер, Коџобашија соработувал како композитор-изведувач неколку пати во изминатите години. Со „Птици“ на Аристофан во Националниот Тетар во Лондон 2001 година и со „Мајмунот на Кафка“ во продукција на „Young Vic“ од Лондон, која, по Франција, Австралија, Грција, Турција, Jапонија и Таи пеи, од 2. до 17. април премиерно ќе гостува во светски познатиот „Баришњиков уметнички центар“ во Њујорк, САД.
Претставата изведена во Лондон била посветена на одбележување на 20 години на дипломатски односи и соработка помеѓу Обединетото Кралство и Република Македонија.
Коџобашија во Македонија ќе настапи со членовите на ансамблот „Пенлопе Х“ ( Бранислав Николов/Фолтин, Пеце Атанасовски/Брада, Гоце Јовановски, Гоце Стевковски и Џијан Емин) на концертот најавен за 31 март во МОБ, кој е дел од програмата на годинашните „Денови на македонска музика“.