Ден затишје во случајот „Рекет“ пред утрешното продолжение на рочиштето во Кривичниот суд против прво и второосомничените, Бојан Јовановски-Боки 13 и поранешната шефица на СЈО, Катица Јанева, кои се изјаснија дека не чувствуваат вина во предметот во кој како оштетен се јавува бизнисменот Јордан Камчев. За разлика од нив, третобвинетиот Зоран Милески-Кичеец уште на почетокот на главната расправа призна вината и вчера доби казна затвор од три години за делото „примање награда за противзаконско влијание“.
Претседателката на судечкиот совет, Васка Николовска-Масевска образложи дека Кичеец е виновен затоа што со Боки 13, преку претходно воспоставени пријателски односи, влијаел врз Јанева да се изврши службено дејство што не би смеело да се изврши. Истото беше поврзано со кривичната постапка што ја водеше СЈО против Јордан Камчев во предметот „Империја“ и замена на мерката притвор со поблага мерка куќен притвор.
За сето ова придонел Кичеец со закажување на средби меѓу Камчеви со Боки 13 на кои се договарало познатиот скопски бизнисмен да добие својство на заштитен сведок со намера да ја запре истражната постапка и со него да се склучи предлог-спогодба за вина за полесно кривично дело, да плати незначителен износ на штета, да му се укине мерката на претпазливост и привременото одземање на пасошот.
На средбите Кичеец ги уверил во влијанието на Боки 13 врз Јанева, а за посредувањето е примена награда со вкупен износ од еден милион и петстотини илјади евра, и тоа од Ана Камчева 500.000 евра, а од Јордан Камчев еден милион евра.
Боки 13 и Катица Јанева ќе докажуваат дека не се виновни. Јавната обвинителка Вилма Рускоска во воведен говор на судското рочиште рече дека жртви во овој предмет не се тие на кои им се барале пари, туку жртви сме сите граѓани на оваа држава.
Обвинителството, рече Рускоска, ќе докаже дека Јанева го направила тоа од алчност и дека свесно ја злоупотребила службената положба, со што ја издала довербата на народот.
„Ќе изнесеме цврсти докази дека Јанева свесно и со умисла на Боки 13 му изнесувала материјали од предистражни постапки кои се службена тајна за да може Боки 13 од обвинетите во тие постапки да бара милионски пари за постапките да завршат со спогодба или во најдобар случај како сведоци“, изјави Рускоска.
Првообвинетиот Бојан Јовановски-Боки 13 во Судот рече дека живеел за денот кога ќе може да зборува, зашто е цел на јавен линч пет месеци за монтиран случај наречен „Рекет“. Второобвинетата Јанева, пак, рече дека не се чувствува виновно и дека е горда на СЈО и тимот што го водела четири години.
Судењето продолжува в петок против првообвинетиот Јовановски, кој се сомничи дека сторил кривично дело „перење пари и други приноси од казниво дело“ и второобвинетата Јанева за „примање награда за противзаконито влијание“ и за „злоупотреба на службена положба и овластување“.