Собранието денеска напладне треба да одржи продолжение на шестата седница на која се расправа за разрешување на државниот јавен обвинител Марко Зврлевски.
Вчера пратениците расправаа цел ден, до вечерта, а спикерот Талат Џафери во обид да воведе ред постави четири лица од собраниското обезбедување на говорница, откако опозицијата повторно ја окупираше.
Пратениците од опозицијата си реплицираа меѓу себе, но и продолжија да ја оспоруваат расправата за Зврлевски, тврдејќи дека разрешувања по распишување на избори се спротивни на изборниот законик.
Предлогот за разрешување на Зврлевски е поднесен од Владата поради, како што се наведува во образложението, незаконито, ненавремено и недоволно стручно вршење на функцијата. Исто така, во документот се наведува и дека Зврлевски со своето однесување и дејствување покажал дека не е способен за извршување на функцијата, како и поради тоа што не поднел барање за покренување кривична постапка за случаи предвидени со закон и нарушување на угледот на функцијата.
Барањето на Владата, за пратениците од опозициската ВМРО-ДПМНЕ, е неосновано и неаргументирани. Тие се повикуваат на членот 8 а од Изборниот законик со кој, како што велат, е истакнато дека сите постапки за назначување и разрешување функционери несмеат да се случуваат кога се објавени избори.
Вчера во еден момент ја снема дури и картичката за гласање на претседателот на Собранието Талат Џафери. Илија Димовски од ВМРО-ДПМНЕ ја извлекол картичката на Џафери, по што претседателот на Собранието го повика обезбедувањето, а пратениците од опозициската партија се насобраа околу говорницата.