Венециското биенале е најстарата и се уште најпрестижната светска манифестација за современата ликовна уметност. За стручната јавност, биеналето се отвори денеска, а за најшироката публика, официјално ќе се отвори на 1 јуни и ќе трае до 24 ноември.
На годинашново биенале се претставуваат 90 национални павилјони, меѓу кои, за прв пат годинава учествуваат Ватикан, Косово, Нигерија, Бахами, Кувајт,Малдиви, Парагвај, Брегот на Слонова коска, Kралството на Бахреин
На централната изложба насловена „Енциклопедиска палата“ , уметничкиот директор Максимилијано Џони, во Италијанскиот павилјон покани уште 150 уметници.
Покрај ова најавени се уште 48 колатерални настани, кои, исто така ги избра Џони.
Според претседателот на Венециското биенале, Паоло Барата, повторно ја спровеле „двојната“ форма дефинирана во 1998 година – голема меѓународна изложба режирана од куратор специјално избран за оваа намена и национални учества.
„ Индивидуалните национални павилјони се многу важен белег на Венециското биенале. Тоа е стара формула и витална како никогаш досега. Таа е драгоцена во време на глобализација, бидејќи дава основен материјал за референциите според кои секогаш новите, разновидни, автономни географии на уметници може да се посматраат и подобро да се запознаат. Може да се постави прашањето до кои граници овие павилјони ја носат со себе желбата за репрезентација на својата земја, кој го организира претставувањето, иако автономијата на кураторите е голема. Но, секоја земја има своја историја и стил. Во павилјоните земјите ги откриваат улогите во современата сцена како менаџери на нивното сегашно и културно богатство низ историјата“, вели Барата.
Главниот куратор на Биеналето, Масимилијано Џони за темата „Енциклопедиска палата“, се навратил на самоукиот италијанско-американски уметник Марино Аурити. Тој во 1955 година со Американската канцеларија за патенти го објавил дизајнот на „Енциклопедиска палата“ – имагинарен музеј во кој требало да се собере светското знаење и на едно место да ги обедини најголемите достигнувања на човековата раса, од тркалото до сателитот.
„Се разбира неговиот план не бил никогаш реализиран, но сонот за универзално, севкупно знаење се провлекувало низ историјата. Аурити ја сподели идејата со многу други уметници, писатели, научници и пророци кои се обиделе да ја модернизираат сликата за светот и да ги „фатат“ неговите бесконечни разноликости и богатства. Овие лични космологии, со нивните илузии за семудрост, фрлија светло на постојаниот предизвик за помирување на сопственото со универзумот, субјективното со колективното, специфичното со генералното, индивидуалното со културата на конкретното време“, вели Џони.
Од сите балкански земји најголем павилјон има Србија која го наследи од Југославија, другите држави секоја година бараат простор за своето претставување.
Македонија годинава ја претставува уметницата Елпида Хаџи-Василева, која живее во Брајтон, Велика Британија, а предизвик контроверзи и реакции од здруженијата за заштита на животните, бидејќи во изработката биле употребени кожи од стаорци и живи стаорци.