Британскиот режисер Дени Бојл најави второ продолжение на култниот филм “Треинспотинг” (Trainspotting), со кој се прослави во 1996 година, филмот во кината би пристигнал дури во 2016. година.
Така, “Треинспотинг 2”, би се појавил во кината точно две децении по прикажувањето на оригиналниот филм кој одбележа една цела генерација на млади луѓе.
Британскиот режисер од поодамна сака да направи продолжение и во неколку наврати ја објавуваше својата намера, последен пат – пред три години.
Во изјавата за порталот “Playlist”, Бојл вели дека за второто продолжение на филм планира да го адаптира романот „Порно“ од Ирвин Велш, автор на книгата „ Trainspotting”, објавена во 1993 година. Се работи за приказна со истите ликови, чии што животни патеки се вкрстуваат десет години подоцна.
Рентон (го играше Јуан Мекгрегор) станал сопственик на ноќен клуб во Амстердам и се согласува да го финансира порно филмот на Сик бој. Сепак, мора да се соочат со Френсис Бегби (Роберт Карлајл), кој само што излегол од затвор и сака да му се одмазди на Ренотн кој исчезна со парите од продажбата на хероинот, со што заврши првиот филм.
Најголем проблем на режисерот на „Сиромашниот милионер” ќе биде да го убеди Јуан Мекгрегор да ја репризира улогата на Рентон.
Мекгрегор, кој играше во три филмови на Бојл, се уште му е лут на режисерот бидејќи насловната улога во „Плажа“ му ја даде на Леонардо Дикаприо, а не нему.
Инаку, најновиот филм на Дени Бојл – “Транс”, ќе има премиера на 27 март. Последен филм на оскаровецот беше „127 часа” од 2010 година. „Транс“ е психолошки трилер во кој играат Џејмс Мекавој, Росарио Досон и Винсент Касел.