Земја и граѓани кои упатуваат порака до Европа: „Да, ние можеме“ или „Сметајте на нас“ ја потврдуваат вербата на Евроспката унија во целиот регион кој се обнови благодарение на вашите напори за спроведување на реформите за градење едно општество за сите, за градење консензус околу националните прашања за јакнење на односите со соседите и заедно со Европска унија за справување со предизвикот на миграцијата, изјави амбасадорот на ЕУ во Македонија Самуел Жбогар, на централната манифестација по повод 9 Мај, Денот на Европа што се одржува во Штип.
Тој додаде дека денеска се слави мирот во Европа и се оддава почит на визијата за подобар свет, како и храброста таа визија да се претвори во реалност.
Македонскиот премиер Зоран Заев рече дека иднината на Европа е иднина која му припаѓа на секој европски граѓанин, а граѓаните на Македонија „ја избраа Европа и Европската унија, бидејќи се изградени на вредностите во кои веруваат“.
– Новиот циклус на преговори на Европската унија со Западен Балкан, најавен од претседателот на Европската комисја Жан Клод Јункер, е уште еден историски чекор на Европа, кој ќе ја направи Унијата уште поголем економски и политички играч на светската сцена. Оттаму, кога велиме дека Европската унија е избор на граѓаните на Република Македонија, велиме и дека тоа е избор на економски посилна Европа. Избор за поправедна и побезбедна Европа, која ни припаѓа на нас, на сите нас, рече Заев.
Евроамбасадорот Жбогар, премиерот Заев и штипскиот градоначалник Бочварски свечено го отворија и ЕУ паркот, каде што сите членки на ЕУ се претставуваат пред граѓаните, а исто така музички групи, ликовни изложби, спортски натпревари и низа други настани се дел од целодневната манифестација што се одржува на градскиот плоштад „Слобода“ во Штип.