Од 28 март до 9 април ќе се одржуваат 36. Денови на македонската музика кои ги организира Сојузот на композиторите на Македонија. Во програмата на годинашната манифестација околу 70 отсто се први изведби на македонски дела, од над 50 македонски композитори, најголем број млади автори.
Деновите ќе бидат отворени во четврток во Македонската опера и балет со концертот „Синтези“ на Македонската филхармонија, наменет за поширока публика, на кој естрадни и оперски имиња ќе изведат познати народни песни оркестрирани од македонски композитори. Манифестацијата ќе заврши во МОБ со премиерата на балетот „Александар Трети Македонски“ на Љубомир Бранѓолица, во кој улогите ќе ги играат Александра Мијалкова и Васил Чичијашвили.
Манифестацијата од оваа година има нов уметнички совет. Во екипата се претседателот на СОКОМ Сони Петровски, Јана Андреевска и Дарија Андовска. Kонцептот не е сменет, фестивалот останува на зацртаната цел – да го претстави современото македонско музичко творештво, но да бидат присутни и претставници на постарата генерација композитори.
– Повторно имаме шаренило од изведувачи и ансамбли. продолжува соработката со клучните институции – Македонската филхармонија, Македонската опера и балет, Факултетот за музичка уметност, но и со странски музичари кои не само што изведуваат овде наша музика, туку и потоа надвор ја имаат на својот репертоар, вели Јана Андреевска.
На 36-тите ДММ ќе гостуваат ансамбли од Австрија, Словенија и од Германија. Два концерта, на 29-ти и на 30 март, во Музеј на Град Скопје ќе одржи виенскиот ансамбл „Реконсил“, кој еднаш веќе има настапено на оваа манифестација. На истата локација на 2 април ќе гостува триото „Арс музика“ од Љубљана, кое ќе изведе дела од словенечки, македонски и српски автори, а на 6 април во Музејот на македонска борба ќе настапат шест члена од Минхенскиот камерен оркестар заедно со Камерниот оркестар на Македонската филхармонија.
Два камерни концерта со дела од македонски композитори, насловени „Made in Macedonia“, ќе бидат одржани на 1 и на 8 април во Музеј на Град Скопје, а на 3 април во Музеј на македонска борба ќе настапи Камерниот мешан хор „Про арс“. Во годинашната програма е отстапен простор и за други жанрови и концерти на електронска музика – Концерт на Никола Коџабашија и Пенелопе Х и вечер на електро-акустична музика.
Традиционалните награди на СОКОМ ќе бидат врачени на 31 март во МОБ. Наградата „Трајко Прокопиев“ за животно дело ќе ја добие етномузикологот Ѓорѓи Ѓорѓиев, „Панче Пешев“ за најдобро премиерно или публикувано дело, годинава, му припадна на младиот автор Александар Пејовски за премиерната изведба на делото „ОоПАаИХА“, а наградата „Георги Божиков“ за најдобра изведба на дело од македонски автор СОКОМ и ја доделува на пијанистката Ана Гацева за изведбата на композицијата Варијации за пијано „15 елементи за разубавување на индивидуалното“ од Мајкл Бакрнчев.
Покрај концертната, ДДМ ќе има и придружна програма – промоција на компакт-дискови и предавања и работилници. За студентите на ФМУ предавање ќе одржи виолончелистот Бриџет Мекреј од Минхенскиот камерен оркестар.