Published: Thursday, September 22, 2022 14:42
Уникатниот микс на Медитеранска и Континентална клима на нашето поднебје создава одлични услови за производство на квалитетен македонски мед, кој потекнува од недопрени планински или ливадски предели, па така бројот на одгледувалишта од година в година сè повеќе се зголемува, се вели во постот на Фејсбук профилот „Вкуси го животот“ (Taste the life).
„Денеска во Северна Македонија постојат околу 7.000 пчелари, со повеќе од 300.000 пчелни семејства кои произведуваат врвен мед, со исклучителни хранливи и лековити својства, како и голем број останати пчелни производи.
Бојата, аромата и вкусот на медот варираат зависно од видот на медоносните растенија во близина на пчеларникот, а меѓу најпознатите во наша земја се планинскиот, ливадскиот и багремовиот мед“, порачуваат администраторите на профилот.
Потоа тие наведуваат неколку видови на мед и совети до граѓаните како да ги препознаат
Планински мед
Се карактеризира со интензивен вкус и арома, темна боја и има јако антибактериско и антивоспалително дејство.
Ливадски мед
Бојата на овој вид мед варира од светло-жолта до нијанси на црвена и содржи природни ензими, минерали и аминокиселини кои ја зголемуваат издржливоста на организмот.
Багремов мед
Ниската стапка на сахароза и високата стапка на фруктоза го прават овој вид мед погоден за лица со дијабетес.
На крајот на постот, тие апелираат до сите заинтересирани лица кои сакаат да пробаат или купат македонски мед или други пчелни производи од македонските пчелари, да ја посетат традиционалната манифестација „Денови на македонскиот мед“ која почна денеска и ќе трае до 30 септември на улица „Македонија“ во центарот на Скопје во организација на пчеларското здружение „Матица“.