„Бидете гласни, искажете го Вашето мислење без страв, бидејќи Вие сте корективот на општествените политики, Вие сте симболот на слободата и на прогресивниот дух и иднината на Република Македонија“, им порача министерката за образование Рената Тренеска Дескоска, на студентите кои денеска ја започнуваат новата академска година.
-Вашето присуство во амфитеатрите и лабораториите докажува дека сте ја разбрале пораката која вели: Инвестирањето во знаењето е најсигурната одлука, како на личен така и на општествен план. Само луѓе кои се стекнале со одредени компетенции, кои се подготвени стручно и професионално да се справуваат со задачите и предизвиците ќе бидат конкурентни на пазарот на трудот, а со тоа ќе придонесат и за сопствената, но и за општата благосостојба на заедницата во која живеат, се вели во обраќањето.
Таа вети дека како министер ќе се залагам за подобрување на стандардот на студентите, а истовремно ќе ја гарантирам и автомијата на Универзитетите, додека на колегите професори им порача дека се на „иста страна, имаат заедничка мисија, заедничка цел“ да обезбедат повисок квалитет на високото образование, академска и творечка слобода.
Министерката Дескоска рече дека ќе им биде вистински партнер кој заедно ќе работи на исполнување на сонот за светски признати универзитети.