Контроверзниот учебник за четврто одделение по „Општество“ за кој Народниот правобранител утврди дека има дискриминаторска содржина, ќе биде повлечен од страна на Министерството за образование и наука со потпис на министерката Рената Дескоска.
По прифатената претставка од Омбудсманот на жалбата на Коалицијата „Сексуални и здравствени права на маргинализираните заедници“ и по предлог на Комисијата за учебници во МОН, одлучено е учебникот да биде остранет.
Откако на социјалните мрежи се рашири извадок од дискриминаторската содржина, родители реагираа на задачата во која од децата се бара фотографија од свадбата на родителите, како и датум на стапувањето во брак и слични податоци, што ги вознемири децата на еднородителските семејства.
Претставката беше поднесена од 40-тина мајки кои живеат во еднородителска заедница, вонбрачна заедница или во брак, со поддршка на СЗПМЗ (Коалицијата Сексуални и здравствени права на маргинализирани заедници).
Ова е прва ваква одлука на министерката Дескоска, која неодамна изјави дека сите учебници од сите нивоа на образование ќе бидат ревидирани, и ќе се отстранат содржините кои поттикнуваат дискриминација по било која основа како и говор на омраза.