По претставката упатена од страна на 40. мајки преку Коалицијата „Сексуални и здравствени права на маргинализираните заедници“ до Народниот правобранител минатата година за содржината во учебникот по „Општество“ за четврто одделение, Омбудсманот ја уважил и заклучил дека истата е дискриминаторска.
Во една од активностите, според содржината на учебникот, од децата се бара да донесат фотографија од свадбата на нивните родители и да одговорат дали се венчани во црква.
– Извадокот од учебникот се појави на социјалните мрежи и голем дел од самохраните мајки реагиравме, бидејќи тоа ги стави во дискриминирачка и вознемирувачка позиција нашите деца. Слична ваква содржина имаше и во градинката каде што оди моето дете и знам дека трауматично ја прими таа активност, како и другите деца од еднородителски семејства или оние кои се посвоени, вели Ирена Цветковиќ, која е потписник на претставката.
Како што вели таа, со оваа дискриминација биле погодени и родителот и детето, а впрочем многу од мајките споделиле и потресувачки искуства кога се разговарало за идејата да се поднесе претставка.
– При оваа дискриминација и детето и родителот се погодени. На Фејсбук кога ја отворивме дебатата за оваа содржина, многу мајки кои споделија искуства кои се соочија со оваа активност, раскажуваа потресителни и тажни приказни. Некои деца дома си одеа расплакани и не сакаа да одат на училиште бидејќи немаа фотографија да однесат, вели Цветковиќ.
Ист е мотивот и на Дороти Пачкова, самохрана мајка и активистка. И таа се приклучила во листата подносители на претставката поради дискриминаторската содржина во учебникот.
– Во учебниците како што утврдивме се дефинира семејство на еден единствен начин а тоа е дека семејство е заедница која е формирана од мајка, татко и деца. Ние како претставници на еднородителски семејства се најдовме дискриминирани, а исто така и Комисијата за антидискриминација утврди дискриминација конкретно кон сите деца кои се дел од еднородителски семејства и не живеат со двајца родители.
– Имаме таргетирано уште неколку учебника, меѓутоа истото се случува и во државните јавни установи кои згрижуваат деца од претшколска воразст каде бараат да се нацртаат членовите од семејството и да постават слики од свадбите на родителите, а имаме големи број на членки кои имаат деца надвор од брак или со исчезнат родител, а тие деца се исто така дискриминарани бидејќи не можат да да постават непостоечки слики, реагира Пачкова.
Содржината од овој учебник е спротивна на Законот за семејство кој гарантира еднаквост на децата родени во брак и надвор од него, спротивна на Законот за спречување и заштита од дискриминација, кој забранува дискриминација врз основа на брачен и смеен статус во образованието и спротивна на целите на основното образование согласно Законот за основно образование, и правото на образование на секое дете без дискриминација.
Министерката за образование и наука, Рената Дескоска, неодамна најави ревизија на речиси сите учебници на сите образовни нивоа и отстранување на дискриминирачката содржина.
Таа потенцираше дека на ревизијата ќе работат експерти и комисии и секоја содржина за која ќе се утврди дека е погрешна, односно дека поттикнува говор на омраза или дискриминација, ќе биде отстранета.
– Со оглед на тоа што јавноста честопати беше соочена со примери на учебници во коишто имаме погрешни констатации, каде што има говор на омраза, каде што има дискриминаторски ставови и предрасуди значи сите учебници ќе бидат отворени на процес на ревизија во целокупното образование со цел да се отстранат грешките коишто учениците ги учат, посочи министерката.
Таа потенцираше дека не смее да се дозволи учениците да учат од погрешни учебници или учебници што ги учат на предрасуди, дискриминација, со говор на омраза и слично, и дека за ова треба да се направи сериозна реформа.