Децата кои треба да се оперираат на срце нема веќе да се праќаат во странство. Тим од јавното здравство на чело со доктор Владимир Чадиковски се сели во приватната болница „Филип Втори“ на Жан Митрев. За најтешките случаи ќе се бара помош од стручњак од Бугарија кој ќе доаѓа на повик, најави денеска министерот за здравство Венко Филипче.
Тој нагласи дека за тешките случаи кои не можат да се решат во државата ќе одлучува тим од сите институции.
Надлежните во здравството сметаат дека на ваков начин државата ќе заштеди, а со проектот јавно -приватно партнерство со кардиохиругија Филип Втори ќе има одлични услови за лекување на овие деца.
Филипче соопшти дека додека не биде готов новиот Клинички центар, ќе се оди на вакви модели на јавно приватно партнерство.
„Трошокот за овој договор ќе остане ист, услугите кои ги купува Фондот од Детската кардиохирургија, сега ќе ги купува од друго место. Очекуваме за ист трошок да имаме подобри услови за работа на лекарите, за престој на децата и нивните семејства. Ова е модел со кој сакаме докторите да ги задржиме во нашата земја. Додека не биде готов новиот Клиничкиот центар, не можеме да исполниме инфраструктурни услови за нови методи, посебно за тие кои бараат мултидисциплинарен пристап, а тоа значи повеќе специјалности на едно место со цел да се направи нова метода и интервенција. Очекуваме дека со ова дополнително ќе бидат стимулирани докторите и медицинските сестри“ нагласи Филипче.
Министерот смета дека освен што ќе се заштеди сума пари кои сега одат кај странските едукатори, туку и планира и Центарот да стане регионален.
„Очекуваме овој центар да стане регионален, без конкуренција во целиот регион. Очекуваме дека овој модел ќе го преземат и околните земји, бидејќи со одлив на здравствен кадар се соочуваат и Бугарија, Србија, Албанија, Грција, Косово“, рече Филипче.
Директорот на ФЗОМ, Ден Дончев рече дека наместо за некои од тие услуги за лекување деца странство да плаќааат на странска здравствена институција, тоа ќе го прават на нашите здравствени здравствени установи. Тој посочи дека кардиохирушките интервенции кои ќе се извршуваат во приватната болница ќе продолжат да бидат на товар на Фондот како и досега. Буџетот кој го издвојува Фондот за оваа намена планирано е да остане ист, а планираат долгорочно ова партнерство да резултира со создавање центар на извонредност.
„Веруваме дека преку овој проект значително ќе ја намалиме бројката на дечиња кои ги праќаме во странство за овој тип интервенција. Фондот во просек обезбедува милион евра на годишно ниво за здравствени услуги за детска кардиохирургија на домашната клиника. Во просек испраќаме годишно околу 20 деца во странство за кардиоваскуларни интервенции. Една здравствена интервенција чини од 15.000 до 20.000 евра. Тоа се дополнителни 300.000 до 400.000 евра во просек кои Фондот ги обезбедува за лекување на децата во последните неколку години. Средствата кои Фондот ќе продолжи да ги обезбедува за овие здравствени услуги ќе бидат на исто ниво, но условите за работа ќе бидат значително подобри. Тоа е најголемата мотивација бидејќи го реализираме ова јавно-приватно партнерство“, истакна Дончев.
Надлежните се откажаа од планот за државна детска кардиохирургија бидеќи, како што велат, тоа е голема инвестиција.
Но, она што загрижува е моментот на транспарентност кој досега го немаше од страна на приватните болници. Јавноста досега немаше увид во процентот на смртност ниту, во другите аспекти на работењето на приватните болниците. Често новинарите при поставување на вакви прашања наидуваа на отпор од сопствениците и закани со тужби.
Министерот Филипче вети дека се што ги интересира новинарите и целокупната јавност за работењето во кардиохиругијата Фипип Втори, како и во другите приватни болници, информациите можат да го добијат преку Министерството за здравство.