Конститутивната седница на новото македонско Собрание ќе се одржи на 4 август (вторник) со почеток во 12 часот, откако претседателот на законодавниот дом, Tалат Џафери, го потпиша Решението за нејзино свикување.
Конститутивната седница ќе се одржи по здравствени протоколи и критериуми за намалување на ризикот од евентуално ширење на Ковид-19. На пратениците, на гостите и на претставниците на медиумите при влезот во зградата на Собранието ќе им биде мерена телесна температура, по што ќе им биде овозможено да влезат во зградата. На сите влезови ќе бидат обезбедени средства за дезинфекција.
За да се запази пропишаната физичка дистанца, конститутивната седница ќе се одржи во Големата сала на Собранието (Голема купола). Пратениците ќе бидат на соодветна дистанца и ќе им биде обезбедена заштитна опрема. Гласањето на седницата ќе се одвива рачно (со картончиња), а од седницата ќе има директен пренос на Собранискиот канал на МРТ.