Пратеник не смее да излезе на говорница додека не добие збор, таа песна нема никој да ја пее! Ако некој почнал јавно да ме навредува на лична основа, што сум јас таму? Не е ниту еден отсто тоа што им враќам на тие навреди. И јас имам праг на толеранција, мора да сметаат на мојот карактер. Имам и семејство, деца и внуци, вели Џафери.
Прерано е да ги коментирам најавите за уставни измени и за референдум во врска со европскиот предлог. Нема материјал за да се изјаснам. Опозицијата хипотетички прави ситуација, истакна претседателот на Собранието, Талат Џафери, на денешниот брифинг со новинарите на кој се осврна за досегашната работа на Собранието, од почетокот на мандатот.
Наспроти обвинувањата на опозицијата дека нема кворум за нови, а се закажуваат веќе започнати седници, Собранието е функционално. Два закони – законот за прекршоци и законот за следење на комуникациите не се донесени и за нив е потребно двотретинско мнозинство, рече Џафери.
За тоа тоа што околу 80 точки не се разгледани, тој смета дека се виновни претседателите на комисиите бидејќи не закажуваат седници.
– Нека се изјаснат дали седниците не ги закажуваат поради партиски или политички одлуки, запраша Џафери.
Џафери се осврна на однесувањето на пратениците и неприсуството на седници, а најави и дека е можно донесување нов деловник за работа.
– Пратеник не смее да излезе на говорница додека не добие збор, таа песна нема никој да ја пее! Ако некој почнал јавно да ме навредува на лична основа, што сум јас таму? Не е ниту еден отсто тоа што им враќам на тие навреди. И јас имам праг на толеранција, мора да сметаат на мојот карактер. Имам и семејство, деца и внуци, вели Џафери.
Тој ги повика пратениците на ВМРО-ДПМНЕ да ги остават настрана партиските прашања, дека не може да бараат пауза, а да не се присутни во собраниската сала.
Спикерот Џафери денеска изјави и дека не се подготвува за предвремени избори.
– Кој сака, нека поднесе предлог за распуштање на Собранието. Да ја потсетам опозицијата дека за тоа се потребни претходни подготовки, 100 дена пред вакви избори се потребни за техничка Влада и тој услов беше даден од сегашната опозиција со Договорот од Пржино, нагласи Џафери.
Во врска со тоа што од седниците редовно отсуствуваат лидерот на ДУИ Али Ахмети и на ДПА Мендух Тачи, Џафери одговори дека тие се најредовни во Собранието кога се гласа. А отсуството на Ахмети од седниците, рече Џафери, е поради партиски активности, како лидер на партија.
Пратениците одат на одмор од 3 август, по празникот Илинден, а со активности ќе продолжат од 29 август, кога ќе се одржуваат продолженија на незавршени седници и седници на комисии. Првата редовна седница ќе биде закажана на 13 септември.
Одржани се 83 пленарни седници во овој мандат, од кои 52 се завршени, а 29 седници не. На 83 седници имало 973 точки на дневен ред, а не биле разгледани 80, бидејќи претседателите на комисиите не свикуваат седници.
(Љ.Б.)