Претседателот на Собранието, Талат Џафери денеска сведочеше за обидот за убиство на Зијадин Села на 27 април лани во Собранието.
Џафери е прв сведок на денешната главна расправа. На почетокот на рочиштето, судијката Славица Андреевска го праша Џафери дали го разбира македонскиот јазик, на што тој одговори потврдно и оти не му е потребен преведувач.
Џафери прво одговара на прашања обвинителот од ЈОРМ Дарко Јакимовски, а потоа и на одбаната на обвинетите.
Сведочењето го почна со објаснување на случувањата во собранскиот прес-центар.
-Влеговме во прес салата, давав изјава за медиумите. Пред да завршам на монитор ја гледавме состојбата пред Собранието. За кратко дел од нив влегоа во Собранието. Дел од обезбедувањето не дозволуваше да се отвори вратата во прес салата, но притисокот беше голем и дел од граѓаните влегоа. Веднаш почнаа и нападите врз пратениците. Тие направија кордон и ми рекоа да застанам позади за да не стигнат до мене, рече Џафери, додавајќи дека лево од него бил Села.
Рече дека се почнало околу 19 часот кога група граѓани насилно влегле во прес-центарот на Собранието.
– Насилно почнаа да напаѓаат, прво физички, а потоа и со сета опрема што се користеше како средство за напад врз сите нас, пратеници, медиуми и сите што бевме во прес-центарот. Зоран Заев, Оливер Спасовски, Горан Мисовски, Александар Кирацовски, Дамјан Манчевски, Весел Мемеди, Сурија Рушити и Зијадин Села направија кордон пред мене и јас се повлеков поназад. Покрај мене беше и снимателот на ТВ 24. Лица кои застанаа во моја заштита, покрај пратениците, беа и од обезбедувањето на Оливер Спасовски. Имаше извици: Ќе ве убиеме сите. Најмногу им се закануваа на Заев, Шекеринска, Спасовски и Села, рече Џафери.
Тој појасни дека му рекол на Села да стои позади и да не се поместува.
-Во еден момент кога се свртев, зошто често зборував на телефон, Села го немаше. Понатаму не знам што се случи со него, сведочеше Џафери.
Како што објасни, прво помислил дека некој од обезбедувањето го извлекол Села надвор, но слушнал дека еден од напаѓачите рекол: „Со Села завршивме, сега редот е на вас“.
Џафери рече дека од Никола Тодоров слушнале дека Села и Шекеринска се тешко повредени и ги бараат. Во меѓувреме, како што рече го проналше Села и ги известиле дека е однесен во Клинички центар.
-Откако не однесоа во касарната Ѓорче Петреов, од таму отидов да го посетам Села – рече тој, рече Џафери.
Џафери не посочи кои се напаѓачите, нп во сведочењето ја опиша ситуацијата. На дополнителни прашања на обвинителот рече дека во Собранието имало луѓе со фантомки и дека тие ги предводеле останатите. Тој појасни дека во прес центарот, требало да има камери кои би го снимиле целото насилство, бидејќи претходно со нив се снимале седниците на работните групи.
По него, за настаните во Собранието на 27 април лани, треба да сведочат и министерот Дамјан Манчевски и пратеникот Александар Кирацовски.