Новиот претседател на Основниот суд Скопје 1, Иван Џолев, вели дека единствениот мотив за да се кандидира за оваа позиција е да се врати довербата во овој суд.
„Долги години сум во Судот, уште од 2002 година, целиот мој работен век и моја цел и желба е да се врати довербата на граѓаните во правдата и во правичноста“, изјави Џолев за НОВА ТВ.
Иван Џолев е роден во 1974 година. Правен факултет завршил на Универзитетот „Свети Кирил и Методиј“ во Скопје, а во 2001 година се регистрирал како адвокат. Во 2002 година се вработува во Основниот суд Скопје 1 како стручен соработник. Во 2008 година е избран за судија, а бил на повеќе позиции како судечки судија, на претходна постапка, истражен судија, а во моментов е судија на прекршочни постапки.
Во акнетниот лист во Антикорупциската комисија, Иван Џолев, пријавил дека поседува возило Мицибуши вредно 14.000. Нема сопствен недвижен имот, има кредит и заем од 13.800 евра.
Судскиот совет на денешната седница гласаше за судијата Иван Џолев да биде новиот претседател на Основниот суд Скопје 1. Тој ја доби поддршката од 11 членови на Советот од вкупно 13. Двајца гласаа против.
Покрај Џолев, во трката за претседател на Кривичниот суд беа и судиите Весна Димишкова, Оља Ристова, Ивица Стефановски, Ѓоко Ристов, Верка Петковска, Осман Шабани и екс-претседателот на судот, Владимир Панчевски.