Теренските проверки во сите подрачни одделенија на Државната изборна комисија се во завршна фаза. Над 550 анкетари во сите 80 општини на територијата на Република Македонија, почнувајќи од 28 март непрекинато работат во периодот од 8:30 до 19:00 часот, соопштија од ДИК и нагласија дека проверките на Избирачкиот список се во завршна фаза.
„Државната изборна комисија во моментов е фокусирана на внесување и обработка на податоците од анкетните прашалници во единствената електронска апликација. Се прават напори сите податоци да бидат на време внесени и соодветно обработени“, с е вели во соопштението од ДИК.
Државната изборна комисија истакнува дека информациите кои се појавија во определени медиуми, а кои се однесуваат на наводно намерно кочење на процесот на теренски проверки, се невистинити. Сите членови на Државната изборна комисија и нејзината Стручна служба се целосно посветени теренските проверки навремено да бидат завршени.