Македонскиот јазик, за нас Македонците, е затворено прашање и дома и во странство. Секое пријателство да биде вистинско и европските интеграции да бидат европски, го подразбираат нашето право на самоопределување, истакна Никола Димитров, министер за надворешни работи и носител на листата на кандидати за пратеници на коалицијата „Можеме“ во Изборната Единица 1. Тој денеска беше гостин во Македонската Академија на науки и уметности (МАНУ) каде присуствуваше на промоција на четири капитални изданија на македонски јазик.
Станува збор за делата „Македонски јазик – континуитет во простор и време“, монографија која дава синтетски преглед на историскиот развој на македонскиот јазик од деветтиот век до неговата кодификација, потоа „Погледи за македонскиот јазик“, зборник на трудови од над 40 домашни и странски лингвисти, „Македонска хрестоматија“ која опфаќа позначајни македонски текстови во периодот од деветтиот до 20. век и „Лингвистички атлас на македонски дијалекти“.
Делата излегоа од печат по иницијатива на МАНУ и вклученост на Институтот за македонски јазик „Крсте Мисирков“ и Филолошкиот факултет „Блаже Конески“ од Скопје.