Претседателката на ДКСК, Татјана Димитровска испрати соопштение за јавноста во кое нагласува дека кредибилитетот и интегритетот на институцијата во никој случај не смее да биде оспорен. Принципот на презумпција на невиност, односно секој е невин додека не се докаже спротивното, како и принципот на владеење на правото, потребно е да се почитуваат. Таа вели дека останатите 6 члена на институцијата која ја претставува, немаат никаква поврзаност со делото за кое е осомничена.
Сакам да ја информирам јавноста дека мојата комуникација со семеен пријател, кој подоцна стана обвинет во случајот „Адитив“, се одвивала во период пред да започне постапка за него пред надлежното обвинителство. Од соопштението од ОЈО за ГОКК се согледува дека нашата комуникација траела до декември 2024 година, или пред да му е изречена мерка притвор по оваа мерка кон него, јас престанувам со комуникација, вели претседателката на ДКСК.
Таа тврди дека дел од споделените информации во комуникацијата се однесуваат на јавни документи чија содржина пред нивната комуникација е објавена во јавност, а останатиот дел е вообичаена пријателска комуникација.
За оваа моја комуникација изразувам жалење и укажувам дека е направена без никаква намера да влијаам на постапката или на било кој аспект на истрагата. Ова го тврдам одговорно, вели Димитровска.
Таа во сооштението за јавноста вели дека во Државната комисија за спречување на корупцијата во тек е постапка за проверка на имотната состојба на наведено лице. Со електронската распределба предметот не е доделен за постапување кај неа, а согласно утврдените правила нема никаква можност да влијае врз текот на постапката или врз исходот. Вели дека одлуките на ДКСК се носат колективно, со мнозинство гласови на членовите.
Целосно ќе соработувам со надлежните правосудни органи и очекувам брза и транспарентна разрешница на настанот. Мерките на претпазливост ќе ги почитувам во целост. До конечно изјаснување на обвинителството нема да давам дополнителни јавни изјави, освен ако тоа го наложат околностите, водејќи се од интересот на институционалниот интегритет и транспарентност, вели претседателката на ДКСК.
Татјана Димитровска очекува дека до тогаш ќе се почитува интегритетот на ДКСК, нејзиниот и интегритетот на нејзиното семејство.
Претседателката на ДКСК, е осомничена во истрагата во „Адитив“ и се товари дека му оддавала тајни информации на поранешниот директор на ТЕЦ Неготино, Небојша Стојановиќ.