Судиите кои без оправдана причина нема да ги закажуваат рочиштата по предметите, ќе ја одложуваат постапката или нема да го зема предметот во работа по што би настанало застареност на кривичното гонење ќе се соочат со дисциплински постапки. Ова меѓу другото го предвидува Законот за судовите што денеска беше изгласан во Собранието и за кој гласаа и пратениците од опозицијата.
Претседател на суд да може да биде разрешен од функцијата доколку Судскиот совет утврди дека не ги применувал одредбите во врска со управувањето и распределбата на судските предмети и кога се повредени одредбите за измена на годишниот распоред на судии.
Судија може да биде разршен и доколку открива доверливи информации што ги дознал постапувајќи по предметите или вршејќи ја судиската функција.
Со измените во Законот за судови Врховниот суд доби рок од шест месеци да даде правно мислење по сопствена иницијатива, по иницијатива на претседател на суд, на судии или по иницијатива на адвокати. Мислењата треба да се објавуваат на веб-страницата на Врховниот суд.
Со донесувањето на дополнетиот Закон за Судскиот совет кој исто така беше донесен денеска, член на Советот, додека му трае мандатот, не може да биде избран за судија, за судија во повисок суд или за претседател на суд.
По предлог на ВМРО-ДПМНЕ од Законот е избришан членот со кој министерот за правда и претседателот на Врховниот суд како членови на Советот учествуваа во работата на оваа институција без право на глас. Член на Советот може да биде оддалечен од вршењето на функцијата ако против него е одобрен обвинителен акт.
Двата закони беа дел од реформскиот пакет и беа усогласени со опозицијата.