Антикорупциската комија на денешната седница едногласно одлучи за утврдување кривична одговорност за градоначалникот на Сарај Блерим Беџети за непостапување за платформата на Матка.
На овој предмет Антикорупциска работеше повеќе месеци и врз основа на добиените документи од надлежните институции и од Општината заклучиле дека градоначалникот, иако имал законска обврска, не го одбил барањето за легализација на дивоградбата која е во делот на заштитено подрачје.
Според членот 22 од Законот за локална самоуправа кој го цитираше претседателката на ДКСК Билјана Ивановска, градоначалникот е должен да носи одлуки за управни спорови, да се грижи за животната средина, што во овој случај не било сторено. По предметот во Општината одлучувало лице кое немало, ниту знаење ниту надлежност.
Градоначалникот Беџети не постапил ниту кога добил известување од Државниот градежен инспекторат, за уривање на дивоградбата, ниту кога реагирала Управата за заштита на културното наследство од каде стигнало известување дека за секоја градба во заштитено подрачје треба да се има дозвола од нив.
Антикорупциска, освен кривичната против градоначалникот ќе достави и барање до Министерството за транспорт и врски да постапи според своите ингеренции, а од Министерството за животна средина што побрзо да го донесе законот со кој кањонот Матка ќе биде заштитено подрачје.
Градоначалникот на општина Сарај, Блерим Беџети на прес конференција за дивите платформи на Матка во март, рече дека нема да ги легализира, но дека не може ни да ги урне, бидејќи има барање за легализација.
Според него, општината работела на овој проблем и констатирано е дека на Матка има три бесправно изградени платформи, но тие не се изградиле сега, туку многу одамна, а тој ги наследил.
-Ова е стар случај со Матка и не случајно општината е единствената институција која прва се изјасни дека има три бесправни објекти во вид на платформи и за кои уште во првата изјава кажав дека не сум за легализација, бидејќи не ги исполнуваат условите за легализација. Но сепак мора да ја запазиме постапката. Но ние не сметавме и до ден денес не сметаме дека само тоа е проблемот на Матка. Убеден сум дека до ден денес и во иднина ќе се докажува тоа натегање околу надлежностите на Матка, изјави тогаш Беџети.
Премиерот Зоран Заев на почетокот на минатиот месец рече дека институциите треба да постапат по решението, но ако некој не го почитува, ќе следува кривина одгоровност.
– Како што и тогаш се изјаснив за платформите, за една има судски спор. Деновие Министерство за траспорт не извести да бидеме претпазливи, да не постапуваме набрзина зашто има двостепеност. Се разбира, согласно законите, ќе се реши и ова прашање, рече градоначалникот на Сарај, Блерим Беџети.
Заменик-министерот за животна средина Јани Макрадули уште во март најави дека наскоро ќе биде готов законот за заштита на пределот на Матка со кој ќе биде строго регулирано што може да се гради на Матка и на Водно.
– Законот за Матка е во понапредна фаза, завршено е зумирањето, подготвени се сите документи, и се надевам брзо ќе влезе во владина процедура изјави во март годинава Макрадули.