Во скопската Стара чаршија попладнево беа доделени 15 електрични колички на оние кои имаат потреба од нив, од страна на Здружението на лица со посебни потреби „СОС Вита“. Како што беше појаснето на настанот, станува збор за донација од хумани луѓе.
Претседателот на здружението, Ертан Шаќири рече дека изминатите пет и пол години откако постои „СОС Вита“, биле доделени 170 електрични колички на лица на кои им се потребни.
Посакувам луѓето со посебни потреби да не се гледаат со други очи, туку, еднакво, како сите останати. Да има пристап до институции за лицата со попреченост, рече меѓу другото Шаќири.
Тој додаде дека ваквите хуманитарни настани со што им се олеснува животот на луѓето со попреченост, ќе продолжат и во иднина.
Триесет и една година сум во количка и добро знам каков е животот на едно лице со попреченост, додаде Шаќири.
Пратеникот и поранешен министер за здравство Беким Сали во изјава за медиуми рече дека одговорноста на политичарите не е само економскиот развој и интегрирањето во Европската Унија. Тој рече дека е присутен на настанот за да даде порака дека и овие лица се дел од општеството. За жал, додаде Сали, забораваме дека и ние можеме да бидеме на нивно место.
Одговорноста на политичарите не е само економскиот развој или интегрирањето во Европската Унија и така натаму, што ни станаа главна агенда на сите вести, сите случувања. Ваквите покани на невладините организации се дел од подигнувањето на свеста кај политичарите, дециден беше Сали.
Тој додаде дека институциите мора да бидат повеќе фокусирани на овозможување подобри услови за лицата со попреченост.
Институциите не смеат да ги остават овие групи занемарени, нагласи Сали.