Европската канцеларија за патенти, во соработка со Европската комисија во Амстердам минатата недела ја додели Европската награда за изумители. Наградата се доделува секоја година од 2006 наваму. Добитниците се поделени во 6 категории.
Беноа Батистели, претседателот на Европската канцеларија за патенти, верува дека заинтересираноста за наградата расте со секоја измината година.
„Мислам дека наградата покажува што носат изумителите во општеството генерално и особено во економијата, и мислам дека значајноста расте со секоја измината година. Нашата цел е оваа награда да стане популарна исто како и Нобеловата награда“, вели Батистели.
Патрик Кувре и неговиот тим од Универзитетот Париз-север во Франција, ја доби наградата во категоријата „Истражување“ за нивниот пронајдок од нано-капсули, 70 пати помали од црвените крвни зрнца заштитени од биоразградливо премачкување, кои ги уништуваат клетките на ракот, без да му наштетат на здравото ткиво.
„Кога ги спроведуваме анти-канцер лековите, тие практично го напаѓаат целиот организам, различни ткива, различни органи, не само канцерогените клетки или канцерогените ткива. Значи целта на овие нано-честички е да ја капсулираат анти-канцерогената молекула и да ја достават директно само до канцерогените ќелии или ткива“, објасна Кувре.
Шведскиот пронаоѓач Пол Најрен ја освои наградата во категоријата за „Мали и средни претпријатија” за измислување на многу побрз, помалку компликуван и поевтин метод на секвенционирање на ДНК влакната.
„ДНК е молекулата на животот, и ако го разберете кодот на ДНК, тогаш може да разберете различни болести, како ракот. И веројатно можеме да помогнеме да се излечат тие болести“, рече Најрен.
Наградата за животно дело ја доби швајцарскиот пронаоѓач Мартин Шат, за измислување на првиот светски рамен екран со течни кристали, познат како ЛЦД.
Следното доделување на наградите ќе биде во Британија.