Власта и опозицијата се договориле за составот на Комисијата која ќе ги испитува настаните од црниот понеделник, 24 декември. Познат правник, чие име се уште не се соопштува ќе раководи со телото што ќе треба да ја утврди одговорноста и причините за случувањата што предизвикаа политичка криза.
Универзитетскиот професор Арсен Јаневски и судиката од Европскиот суд за човекови права во Стразбур, Мирјана Лазарова-Трајковска ја одбиле понудата, иако биле прифатливи за обете страни.
Ставовите на СДСМ и на ВМРО-ДПМНЕ се усогласени, а личноста која ќе претседава со Комисијата, ја прифатила обврската, јавува Алфа.
Според партиите веднаш по празниците, во вторник ќе бидат соопштени имињата на сите членови на Комисијата и ќе бидат прецизно дефинирани задолженијата што ќе ги имаат членовите.
Досега е познато дека опозицијата ќе ја претставуваат професорите на Правниот факултет, Рената Тренеска-Десковска и Љубомир Фрчкоски а власта, поранешната судика Благородна Дулиќ и пратеникот Илија Димовски.
Во работата на Комисијата ќе учествува и странски експерт, но, тој нема да има право на глас.
Резултатите од работата на Комисијата треба да бидат познати најдоцна до септември.