Документи на германската влада со назнака „строго доверливи“, беа пронајдени расфрлани пред приватниот стан на канцеларот Олаф Шолц, откако лисиците му ги искинале кесите со ѓубре, пишува The Telegraph.
Ова ја шокира германската јавност која го осуди канцеларот и го критикуваше за фрлање доверливи информации во канта за ѓубре. Се почна од соседите на Шолц во Потсдам, на периферијата на Берлин кои пронајдоа неколку хартии означени како доверливи расфрлани на улица пред нивната куќа.
Документите главно се однесувале на сопругата на канцеларот Шолц, Брита Ернст, која е министерка за образование во покраината Бранденбург, чиј главен град е Потсдам. Соседите за германските медиуми изјавија дека на прв поглед е јасно дека документите, кои не биле исечени, се владини брифинзи кои апсолутно не биле за јавна употреба.
Ѓубрето, што го видоа медиумите, вклучуваше брифинг од Министерството за надворешни работи на земјата со информации за претстојниот самит на Г7, вклучително и детали за секој од партнерите на лидерите на Г7, пишува Telegraph’s Morning News. Белешката содржела конкретни теми за Кери Џонсон, сопругата на британскиот премиер Борис Џонсон. Документите се однесуваат и на некои од партнерите на лидерите на Г7 во јуни, вклучувајќи ги Брижит Макрон, Брита Ернст и Кери Џонсон.
На брифингот за Марија Серенела Капело, сопругата на италијанскиот премиер Марио Драги, беше кажано дека има диплома по англиска литература и дека „ја избегнува јавноста“.
Во информативните белешки на првата дама на САД Џил Бајден и сопругата на францускиот претседател Емануел Марон има информации за нивните занимања, а во белешките за Јуко Кишида, сопругата на јапонскиот премиер Фумио Кишида, стои дека изјавила дека е „секретарка во јапонската фабрика за автомобили Mazda“…
Покрај белешките за Г7, документите покажуваат и детален план за тоа што Ернст требаше да облече на неколку официјални настани, како на пример кога гласаше на сојузните избори минатиот септември (панталони, сина кошула, тенок блејзер) и на пост -изборен собир (црн костим Hugo Boss, сива кошула, камен синџир, црни патики, црна Anke Runge чанта).
Документите вклучуваат и преглед на говорот што сопругата на канцеларот требаше да го одржи пред парламентот на Бранденбург, детален распоред каде ќе биде Ернст и со кого ќе се сретне, заедно со доказ дека се запишала на курсеви за подобрување на англискиот јазик.
Неколку документи беа означени како „VS Confidential“, највисок стандард за доверливост на владините документи.
Според системот за класификација, документите мора да останат во просториите на официјални владини згради или да се носат на службени патувања.
Двајцата беа на удар на критики во Германија, при што неколку медиумски извори ја доведуваат во прашање одлуката за отстранување на документите на таков начин, имајќи предвид дека и двајцата имаат повеќедецениско искуство во политиката и јавната администрација .
Германскиот магазин Шпигел напиша дека канцеларот и неговата сопруга наводно имаат релаксирана врска со доверливи документи, додека таблоидот Билд остро ги критикуваше навиките за рециклирање на двојката, пишувајќи: „Домаќинството Шолц не сфаќа сериозно кога станува збор за одвојувањето на отпадот – а особено не кога се работи за чување тајни“.
Шолц, кој ја презеде функцијата во декември 2021 година, се соочи со домашни и меѓународни критики во последниве месеци поради наглото зголемување на трошоците за живот, заедно со очигледниот неуспех да ги снабдува украинските војници со тешко оружје и покрај ветувањата за поддршка, пишува The Telegraph.