Домовите за стари лица во последните години стануваат дел од социјалната култура во општеството, и оттука се зголемува и интересот за нивно отворање. Единствениот синџир старечки домови во земјава Феникс располага со три објекти, додека во моментов ќе отвара таков дом и на четврта локација. Во нив има 24часовна медицинска нега, рехабилитација и услуга. Цените за престој се движат од 26.000 до 42.000 денари.

„Имаме наши медицински сестри и доктори кои секојдневно вршат посети и постојано се следи состојбата на нашите корисници. Објекти имаме на три локации, Волково, Капиштец и Пржино а моментално отвораме дом и на четврта локација во Црниче. Во однос на капацитетите имаме 250 легла. Нудиме од еднокреветни до четирикреветни соби, во однос на желбите и потребите на корисниците, изборот е нивен. Цената зависи од видот на собата и од локацијата, вели за НоваТВ Методија Стевановски генерален менаџер на Феникс.

Во „Феникс“ постојат и посебни одделенија кои се посветени на пациенти со специфична дијагноза како што е деменцијата, паркинсонова болест или од друга сериозна болест.

Како што потенцира Стевановски, многу луѓе имаат одбивност и самата помисла за старски дом сеуште кај нас звучи лошо. Тој додава дека „Феникс“ се единствениот синџир старечки домови во земјава, а оваа дејност во Македонија почнува де се развива некаде пред 20-тина години бидејќи целиот Балкан е место каде многу често доминираат предрасудите и многу луѓе на прво споменување создаваат негативна слика за домовите за стари лица.

„Сакаме да ја разбиеме таа табу тема да направиме нешто ново и да покажеме дека Западот допрва доаѓа кај нас. Пред пандемијата со ковид посети од  блиските и фамилиите имаше секој ден, но сега се само за време на викендите. Со договор можат да бидат и повеќе денови. Корисниците имаат и низа активности со тоа што нивните денови се исполнет. Се уште учиме и се надополнуваме“, вели тој.

Највозрасната категорија граѓани се жали дека капацитетите во државните домови се мали, а условите не се на високо ниво. Од пензионерските здруженија уверуваат дека на  луѓето од третата доба секогаш им е потребна дополнителна помош, а во овој динамичен свет, семејствата не можат и немаат време секогаш да бидат постојано со оние стари лица на кои им е потребна нега. Затоа, според нив, државата треба сериозно да му се посвети на овој проблем.

Маја Терзиова