Во првото интервју откако победи на изборите, Трамп вели дека нема да ги поништи промените во системот на здравствена заштита кои ги правеше Обама и дека кривично гонење на Хилари Клинтон не е приоритет.
Доналд Трамп се чини дека ја омекна реториката за повеќе ветувања но и закани кои ги правеше за време на кампањата во своето прво интервју по неговиот избор како американски претседател.
Трамп изјави дека нема да ги поништи промените во системот на здравствена заштита наречени „Обама-кер“ и дека кривично гонење на Хилари Клинтон за нејзините грешки со доверливите мејлови не е приоритет.
Тој претходно говореше дека веднаш ќе ја укине „Обама-кер“ откако ќе дојде на функцијата, но сега за Вол Стрит Џурнал изјави дека само ќе ја реформира мерката.
Трамп и неговата фамилија снимија интервју со СиБиЕс, каде тој имал посмирем тон кон неговиот опонент, Хилари, која претходно ја нарекуваше „одвратна жена“ и измамничка.
За истрагата со која и се закани на Клинтон во врска со нејзините мејлови, тој рече дека не му е приоритет.
„Не размислувам многу за тоа бидејќи сакам да го решам здравството, работните места, граничната контрола, даноците“, рече тој.
Претходно тој изјави дека ќе назначи специјален обвинител кој ќе се занимава со истрагата на случајот во кој Клинтон користела приватен несигурен сервер за да обавува службени доверливи мејлови, додека била Државен секретар на САД.
Изборот на Трамп кој шокираше многумина, предизвика протести низ градовите и универзитетските кампуси во Америка, заради неговите исламофобични и расистички напади.
Тој во интервјуто порача дека сака да го смири јавното расположение. „Сакам земја во која сите се сакаат. Ова најмногу ќе се постигне ако креираме рабтни места“, рече тој.
Запрашан дали отишол предалеку со тонот на неговата кампања, Трамп одговори: Не. Јас победив.