Издавачката куќа „Силсон“ ја објави книгата „Оркестар Титаник“ со избор од пет драми на Христо Бочјев, еден од најизведуваните современи живи автори на светската театарска сцена.
Книгата ја приреди Лилјана Мазова, театарска критичарка и публицистка, која ги преведе драмите од бугарски јазик, а консултант е Мартин Кочовски, режисер. Во книгата се објавени неговите најизведуваните драми на Бојчев: „Undergraund“ („Подземниот“, најнова верзија, 2009), „Оркестар Титаник“ (2002), „Реонска болница“ (изведувана и како „Жена за полковникот“, 1986-2000), „Полковникот птица“ (1997) и „Она нешто“ (1984). Тие се поставени во 45 земји во светот, на исто толку јазици. Изданието е финансиски поддржано од Министерството за култура.
Бојчев е драмски писател и сценарист со необична биографија: од машински инженер кој на 34. години првпат оди во театар со влезница добиена од фабричкиот синдикат, израснува во автор чии драми имаат и по 40 светски изведби, највисоки светски признанија и награди од театарската фела во светот. Пишува и филмски сценарија по кои се снимаат филмови.
„Драмите му се егзистенцијални приказни за човекот денес во светот/лудница. Светот на заборавениот човек кој се тетерави низ животот/општеството во кој/кое тој никому не му треба. Не дека тој човек никој не го гледа! Напротив: се замижува пред небиднината во која е, се прескокнува како изгниено и смрдливо купче измет, од него се врти глава, се бега. Токму поради тој човек од насекаде, во драмите на Христо Бојчев се препознава светот. Нема јунаци и ситуации кои се добри. Има вистина на која, како на сами себе, и се смееме. Тие се и сатиричен приказ на светов кој замижува пред небиднините, осаменоста, сиромаштијата, корупцијата, лудилото…“ констатира Мазова.