Дрес на македонската фудбалска репрезентација му подари претседателот Стево Пендаровски на папата Франциск при денешната официјална посета на Ватикан.
„Папата Франциск прв го добива најновиот дрес на македонската фудбалска репрезентација со неговото име испишано на кирилица. Ова е дресот со кој ќе настапат нашите најдобри фудбалери на претстојното Европско првенство. Нека донесе среќа, нови успеси и победи“, напиша претседателот Пендаровски на „Фејсбук“.
Во рамки на посетата на Ватикан, по повод манифестацијата „Македонија во чест на Св. Кирил”, претседателот и неговата сопруга попладнево беа на аудиенција кај папата Франциск.
„Добивме поддршка и благослов да продолжиме посветено да работиме за мир, среќа и благосостојба на сите наши граѓани. Врз темелите на бесмртното дело на Светите Кирил и Методиј, со заштитниците на Европа и понатаму ревносно да градиме заедничка просперитетна иднина. Му заблагодарив за историската посета што претставува огромно признание за нас“, рече претседателот Стево Пендаровски.
Пендаровски ќе оствари средба и со државниот секретар на Светата Столица, кардиналот Пјетро Паролин. Потоа, претседателот Пендаровски во базиликата „Сан Клементе” ќе положи цвеќе на гробот на Свети Кирил.
Во попладневните часови, Пендаровски, заедно со претседателот на Република Бугарија, Румен Радев, ќе ја посети базиликата „Санта Марија Маџоре”, каде заеднички ќе оддадат почит на делото на светите браќа Кирил и Методиј.