Бизнисменот Дрин Ахмети, чија фирма е нов сопственик на деловниот центар „Соравија“, денес на прес-конференција објасни како дошол до идеја да го купи имотот во центарот на Скопје. Тој рече дека дознал за долговите што ги има деловниот центар, а не може да ги врати, по што стапил во контакт со австрискиот милијардер и инвеститор Хано Соравија. Имало разговори и анализи и тогаш Дрин Ахмети решил со фирмите да го купи бизнис-центарот, но да ги исплати и долговите.
„Ние почнавме од минатата година од април кога испративме писмо со кое побаравме пристап до сите важни финансиски податоци за сите компании што имаат удел во ‘Соравија’. Баравме информации за да ги анализираме податоците и дојдовме до сознанија дека имаат голем долг, кој не може да го вратат. Тоа го видовме ова како можност да направиме нешто. По разговорите, одлучивме да одиме на средба во Виена, кај господинот Соравија. Таму јас ја претставив мојата компанија, мојот конзорциум. Дискутиравме за можноста како да најдеме договор во врска со имотот“, изјави Ахмети.
Бизнисменот посочи дека австрискиот милијардер и инвеститор Хано Соравија, кој остана со 10 проценти удели во бизнис-центарот, сакал партнери во бизнисот. Дрин Ахмети со фирмите нашол кредитна линија за да се платат долговите.
„Хано Соравија ги поздрави дискусиите. Гледаше дека има хемија меѓу нас и сакаше еден конкретен предлог во врска со ситуацијата. И тој сакаше да има мал удел во компанијата што досега ја имаше. Ние дискутиравме од октомври минатата година до мај оваа година кога потпишавме договор. Во договорот, кој е постигнат во врска со финансиите, од наша страна учеството беше најдено преку банка во Албанија, каде што партнерот има свој удел. Уплативме 51 процент во ‘Соравија’“, додаде Ахмети.
„Соравија инвест“ има долг кон банки со износ од 20 милиони евра. Новиот сопственик засега не го отплаќа долгот со свои средства, туку со кредит вратил мал дел од долгот. Потоа, зависно од тоа како ќе тече работата, ќе го враќа и остатокот од долгот.
„Ова е вистинската приказна за компанијата. Ние имаме повеќе од 20 милиони евра обврски. Го презедовме долгот на ‘Соравија’ како одговорност. За плаќањето на долгот на ‘Соравија’ имаме земено кредитна линија 6 милиони евра, од кои три милиони се одобрени. Ова сè е направено за иднината на ‘Соравија’“, рече Дрин Ахмети.
Дрин Ахмети е внук на лидерот на ДУИ, Али Ахмети.
С.К.