Државата ги скрати парите за инсулин, игли, ленти и мерачи на шеќерот во крвта за 60 милиони денари или вкупно еден милион евра. Кратењето на средствата за болните од дијабетес е објавено во Службен весник на 3 април годинава. Во Измените на Програмата за обезбедување на инсулин, глукагон, инсулински игли, ленти за мерење на шеќерот во крвта и едукација за третман и контрола на дијабетес, скратени се средствата од 620.000.000,00 денари на 558.000.000,00. Во текстот нема објаснување зошто с е кратат парите на најранливата категорија граѓани, луѓето за кои инсулинот е еднаков на воздухот кој го дишат.
Од Сојузот на здруженија на дијабетичари се шокирани од ваквата одлука на Министерството за здравство. Прашуваат врз основа на кои критериуми и параметри е направено кратењето на парите за инсулин и инсулински помагала.
„Го прашуваме Министерството за здравство, дали кога ја носеле оваа одлука земале во предвид дека секоја година за 20 проценти се зголемува бројот на нови дијагностицирани луѓе со дијабетес . Кого консултирале за ова? Зошто Националната комисија за дијабетес не реагирала на ваквата одлука?“, прашува Бојан Киров, претседател на Сојузот на здруженија за дијабетес.
Од Министерството за здравство одговорија дека ги следат во континуитет работите и гарантираат дека ќе има доволно средства за да се покријат потребите за сите пациенти кои с е на инсулин.
„Mинистерството за здравство во континуитет ги следи имликациите на постигнатите цени на јавната набавка за инсулин и роковите за доспевање на фактурите и врз основа на тоа врши соодветно репрограмирање на средства во рамки на Програмата за инсулин. Тоа е нормална процедура во финансиското работење на Министерството за здравство. Тоа значи дека до крај на годината има доволно средства за да се покријат потребите на сите пациенти на инсулинска терапија“, се вели во одговорот на Министерството з а здравство.
Инаку, неколку години по ред пациентите со дијабетес имаат проблем со набавката на инсулини. Тие постојано се жалат дека во инсулинските аптеки, инсулините и лентите ги снемува во одредени периоди од месецот поради што се принудени да си позајмуваат едни со други, организирани преку социјалните мрежи. Пациентите се сомневаат и во квалитетот на одредени типови на инсулини за кои велат дека не се ефикасни и не им делуваат.