Наредната среда е последниот рок до кога ќе се знае дали парламентарното мнозинство успеало да обезбеди двотретинска подршка за уставните измени или ќе побара распуштање на Собранието и спроведување на идни вонредни избори.
„Веруваме дека ќе имаме некаков резултат до крајот на неделава или почетокот на наредната. Некаде околу 10 октомври е таргет кога треба да и соопштиме на јавноста кои се следните чекори. Се надевам дека ќе имаме можност да соопштиме дека е обезбедено потребното двотретинско мнозинство, кажа Заев.
Од ВМРО ДПМНЕ велат дека за нив Договорот со Грција е политички мртов, затоа што референдумот бил со бројни нерегуларности и го подржале само 36 проценти од гласачите.
„Констатиравме дека согласно анализата направена од нашиот тим преку 50 илјади ливчиња беа уфрлени во гласачките кутии, понатаму се заплашуваа граѓани, имаше обид за поткуп, влијание врз гласачи, кршење на молк и други нерегуларности со што бевме сведоци на едни целосно недемократски и криминален процес и затоа целата постапка на референдумскиот резултат ја прогласуваме за голем фалсификат и резултатот на референдумот не го признаваме“ кажа партискиот потпретседател Александар Николовски по седницата на Извршниот комитет.
Од ВМРО ДПМНЕ за НОВА ТВ изјавија дека „дали ќе има избори, не зависи од нас“. Од таму ги повторија нивните барања – смена на обвинителот, формирање на техничка Влада и на анкетна комисија која ќе го испитува организирањето и спроведувањето на референдумот. Власта експресно ги одби ваквите барања.
„ Ниту има причина, ниту има потреба да се дискутира за вакви работи. Самите институции дадоа свои коментари. Да се бара комисија која ќе провери дали референдумот бил законски, дали имало законитост во неговото спроведување и слично во услови кога претседателот на ДИК е од ВМРО-ДПМНЕ, како и Управниот суд во кој нема сменето ниту еден член, само по себе кажува што всушност се сака со ваквите барања“ кажа Заев.Тој додаде дека изминатат година, СДСМ ги прифатила сите барања на опозицијата и повторно не добила подршка за евроинтегративниот процес кој е важен за Македонија.
„ Во минатото дадовме карт-бланш за техничка влада. Ги прифативме барањата за финансирање на политичките партии, ја формиравме Државната изборна комисија со претседател од ВМРО-ДПМНЕ. За возврат апсолутно не сакаа ни да разговараат за некаков начин за успешна поддршка на процесите кои се важни за Македонија“ кажа Заев.
Во ДУИ велат дека не треба се брза со распишување на итни избори, туку да се направи обид да се обезбеди двотретинско мнозинство во Собранието.
„Во овие околности, пратениците на ВМРО ДПМНЕ велат дека нема да гласаат, ајде да видиме под кои околности би гласале, затоа што претседателот на ВМРО ДПМНЕ Мицкоски рече дека доколку мнозинството е „за„ тие би гласале за уставните амандмани. Значи има услови под кои би гласале“ вели висок партиски функционер од ДУИ за НОВА ТВ, без конкретно да наведе на кој начин ќе се обидат да ги одоброволат пратениците на опозицијата да дадат согласност за уставните амандмани.