Заврши фазата за давање искази во случајот за невладината организација „Меѓународен сојуз“. Последен го стори тоа Бојан Јовановски-Боки 13, првообвинет во предметот „Рекет“, кој доби решение за завршена истрага по денешниот неколкучасовно изјаснување во Обвинителството за организиран криминал и корупција кое, пак, е на потег да реши дали и на чие име ќе покрене обвинителен акт.
Адвокатот Сашо Дукоски рече дека исказот на неговиот клиент бил темелен и со факти.
„Се работи за детална и ноторна изјава за сите основи на сомневање што се однесуваат во врска со овој кривично-правен настан. Кога тоа ќе се стави на вага со неговата здравствена состојба, добивате еден исказ што траеше навистина долго, два дена или цели 15 часа. За секое зборче што стои во наредбата за истрага, се произнесе со еден куп факти, а не рекла-кажала. Сметам дека се е кажано во врска со основите на сомневање и многу нешта ќе се расчистат по овој исказ“, рече Дукоски.
Исказ пред Боки 13, во текот на минатата недела, даде и осомничената Јасна Мандиќ, потпретседателка на „Меѓународниот сојуз“, која во таа прилика рече дека „била доведена во заблуда од Јовановски“. Дукоски одби да даде коментар, велејќи дека не сака да коментира искази на туѓи лица.
Одбраната, според Законот за кривична постапка, има право да поднесе други докази или исправи или да побара дополнителни докази од обвинителот во рок од 15 дена по примање на известувањето за завршена истрага од Обвинителството. Доколку дојде до тоа, обвинителот е должен да го испорача наведеното во барањето во рок од еден месец. Кога, пак, ќе изминат тие рокови, Обвинителството има можност во рок од 15 дена да подигне обвинителен акт или да ја запре постапката.
Првообвинетениот Бојан Јовановски се товари за две дела – за измама и за перење пари додека под сомнение за помагање во двете дела е потпретседателката на „Меѓународен сојуз“, Јасна Мандиќ. Со проширената истрага за случајот беа опфатени и таткото на Боки 13, Миле Јовановски, неговата асистентка, Христина Блажевска и пратеничката Фросина Ременски, почесен претседател на невладината организација, за помагање во делото измама.
Според Обвинителството, врз основа на предистражната постапка, се дошло до сознанија што укажуваат дека во периодот од јули во 2017 година до април во 2018 година, првоосомничениот Бојан Јовановски-Боки 13, како претседател на осомниченото правно лице, искористувајќи документи од правното лице, довел и одржувал во заблуда управители на две друштва за градежништво.
Притоа ги убедувал дека ќе обезбеди државно земјиште за изградба на домови за стари лица и мобилен сервис за што подоцна ќе обезбедел и субвенции. На тој начин од едната фирма, преку авторска агенција, добил 720.000 евра, а од другата 230.000 евра.