Издавачката куќа „Или-или“ ги објави романите „Љубовно писмо со клинести знаци“ на Томаш Змешкал, што претставува прв превод од чешки на македонски јазик, во превод на Маргарета Карајанова, додека „Талкачи“ на Олга Токарчук е роман на најпреведуваната полска прозаистка во последнава декада, на македонски јазик ја преведе Лидија Танушевска.
Книгите се објавени со финансиска поддршка на Европската програма за култура „ЕАЦЕА 2007-2013“ и на Министерството за култура. Илустрациите на кориците и на двете книги се на Марија Смилевска, а дизајнот го изработи бригада.мк.
Книгите во сабота од 10 до 16 часот ќе можат да се купат по промотивна цена во книжарницата „Или-или“, во рамките на традиционалното „Саботно мени“.
Томаш Змешкал ги вчудовиде чешкиот книжевен свет и читателската јавност со дебитантскиот роман „Љубовно писмо со клинести знаци“ (2008), за кој ја доби престижната чешка награда за литература „Јозеф Шкворецки“ во 2009 година, како и наградата на Европската унија за литература за најдобри нови писатели, заедно со уште единаесет автори, во 2011 година. Оттогаш доживеа светска слава и е преведен на многу јазици. Постмодернистичката сага, стилски, но и жанровски разновидна, изобилува со хумор, иако историските околности во кои се случува се многу тажни. Во романот со строго обмислена структура, авторот не се ограничува на историскиот период на живеење на неговите ликови. Неговата фантазија досегнува до древното хетитско и персиско минато, но и далечната иднина. Приказните се нижат, но не по хронолошки редослед, за да се состават на крајот во совршен мозаик. Токму тоа од романот на Змешкал прави ремек-дело на современата европска книжевност.
Романот „Талкачи“ на Олга Токарчук е метафора за современиот човек, кој е во постојано движење. Романот претставува патување низ просторот, континентите и вековите, мешавина од судбини на различни луѓе, информации за необични феномени и научни предавања, кои читателот ги конзумира како во воз чии патници постојано се менуваат и раскажуваат различни приказни. Целта на патникот е да побегне од реалноста, која е хаотична, сурова и гнила, додека современиот човек е талкачот кој го преуредува светот. Ова е личната визија на Олга Токарчук за светот, чиј напредок го уништува духовното, а го овековечува материјалното. „Талкачи“ е добитник на полската награда „Нике“ за 2008 г.