Љубителите на добриот музички звук оваа година по јубилеен дваесетти пат ќе уживаат во музичката селекција на фестивалот Оф Фест, кој  почнува од денес, а ќе трае до 13-ти ноември. Овогодинешната програма е „свежа“, разновидна и возбудлива, една од најинтересните во скорешната историја на фестивалот.

Фестивалот ќе започне во Кино Фросина во МКЦ со проекција на документарецот „The art of Amalia“, посветен на големата фадо-дива Амалија Родригез, а ќе продолжи во НОБ со настапот на дуото Лина и Раул Рефри, кои испорачуваат осовремено и надградено фадо, музика што ги надминува географските одредници.

На 11-ти ноември со почеток во 20 часот во НОБ ќе може да се проследи мистичниот минимализам, имагинарниот фолк и нескротливата музичка фантазија и вештина на триото Широм (Словенија) во комбинација со апокалиптичната самба на композиторот и гитарист а воедно и еден од најзначајните експоненти на современата бразилска музика Кико Динучи.

Конечно, еден од најинвентивните и најоригинални африкански автори Блик Баси (Франција) заедно со македонскиот Пијан Славен (новиот проект на Бранислав Николов-фронтменот на Фолтин) ќе го заокружат овогодинешното издание на Оф Фест на 13-ти ноември во НОБ.

Оф Фест за првпат се случи во 2002 година како втор фестивал кој се издигна од долгогодишната традиција на Скопје Џез Фестивал. Идејата беше да се создаде уште еден важен музички настан во различен период од годината и жанровски пошироко ориентиран. Иницирањето на Оф Фест се наметна како природен чин во ерата на глобализацијата што резултираше со пораст на креативноста, популарноста на таканаречената „музика на светот“ (world music). Оф Фест презентира музика од сите континенти, со фокус на различни категории, од традиционални, етно, фолк, до урбани, современи и експериментални музички жанрови. Реномирани артисти од целиот свет се дел од долгогодишната традиција на Оф Фест.

Марија Поповска