Две нови операциони сали од денеска се ставени во функција на Клиниката за максилофацијална хирургија. Едната е за поголеми интервенции со општа анестезија, а другата за помали. Реновирана и со пријатен амбиент за пациентите е и шок собата, како и останати делови од објектот.
Клиниката за максилофацијална хирургија денеска одбележува 70 години од своето постоење. По тој повод, Клиниката од денеска ќе го носи името на творецот на модерната максилофацијална хирургија, академик Илија Васков, каде што е поставена и негова биста.
Дел од опремата и хируршкиот стол 11 години стоеле неотворени и никој досега не се сетил да ги распакува и употреби.
„Операционите сали се направени без пари, со сопствена енергија и залагање и со помош на техничкиот персонал. Овие сали се неопходни бидејќи потребата постојано расте, се зголемува бројот на пациенти, а реновирана е и шок собата“, изјави за проф. Др. Славе Наумовски директор на Клиниката за максилофацијална хирургија.
Вработените велат дека дел од ова финансирал и директорот со сопствени средства.
Сепак, и покрај залагањата за подобро функционирање, оваа клиника има недостиг од медицински сестри и анестезиолози кои ги бараат цела година наназад.
„Имаме 17 доктори, а само 12 медицински сестри. Имаме превработеност од лекари, а недостасуваа 8 медицински сестри и 1-2 анестезиолози за што веќе е поднесено барање“, рече директорот Наумовски.
На Клиниката за максилофацијална хирургија се изведуваат најсложените интервенции на лицето, вилиците и вратот. За вкупно 70 години оперирани се 51 642 пациенти под општа анестезија и 201 674со локална анестезија или вкупно 253 316 оперирани пациенти, истовремено правејќи 1 000 000 прегледи.
Најчесто болести се туморите на лицето и вратот со околу 37 проценти, воспаленија на орофацијалната регија со 28 проценти, трауми-фрактури заради сообраќајки, физички, спортски и огнострени повреди со 22 проценти, расцепи на уста со 8 проценти, дентофацијални со 3 и конзервативно лекување со 2 проценти.
На одбележувањето 70 години од постоењето денеска во 15 часот ќе биде откриена бистата на академик Васков во присуство на членови на неговото семејство, министерот Филипче, претставници од повеќе институции и вработените.
Вечерва во 20 часот е планирана свеченост во малата сала на македонската Филхармонија.