Европската банка за обнова и развој (ЕБОР) ја намали проекцијата за раст на македонската економија за годинава на 1,5 отсто од претходното ниво од 1,8 отсто, проектирано во јануари.
Банката, инаку, ги намали проекциите за раст во целиот регион каде што дејствува – Источна Европа и Северна Африка – за речиси цел процентен поен, предвидувајќи просечен раст од 2,2 отсто за годинава.
Банките ширум Европа имаат пари, но се внимателни при кредитирањето по глобалната финансиска криза. Покрај ова, причина за загриженост е и растот на лошите кредити, смета главниот економист на ЕБОР, Ерик Берглоф.
– Ние одблизу ги следиме земјите од Југоисточна Европа. Словенија е дел од оваа приказна, како што се и Украина и Молдавија, но нема многу причини за оптимизам – рече тој вчера на прес конференцијата во Истанбул, каде што Банката имаше редовна пролетна средба.
Покрај ова, во саботата беше објавена и студија на австриската банка, „Раифајзен“, која е наголемо присутна на Балакнот (но, за жал не и во Македонија) , во која се вели дека стапката на лоши кредити во Југоисточна Европа изнесува 17,3 отсто во 2012 гдоина за разлика од процентот од 14,5 отсто во 2011 година, пренесува „Ројтерс“.
Предвидениот економски раст за Македонија за годинава од 1,5 отсто е во рамките на просекот за регионот, кој изнесува 1,4 отсто.
Според предвидениот раст Македонија е некаде на средината на регионот зад Косово, каде што се предвидува раст од 3 отсто, Србија 2,2 отсто и заедно со Албанија каде растот е предвиден исто како и во Македонија на 1,5 отсто.
Прогнозите за 2014 година на ЕБОР се пооптимистички и тие за регионот изнесуваат 2,2 отсто, при што прогнозата за Македонија е 2,6 отсто.
Минатата недела, пак, Европската комисија предвиде раст за македонската економија исто од 1,5 отсто, а во петокот Народната банка излезе со оптимистички проекции за раст на економијата од 2,2 отсто.
